“Nu'udar Prezidente Parlamentu ha’u konvida sidadaun hothotu atu fó onra ba ita-nia eroís no mártire sira FALINTIL sira, liuhusi halo tuir no kaer metin valor no ezemplu ne'ebé sira husik hela mai ita”, dehan Aniceto iha aniversáriu loron FALINTIL ba dala-46 iha Kuartel Jenerál, Fatuhada, sesta (20/08).

Ba komemorasaun loron FALINTIL ida ne'e, hothotu tenke  fó liman ba malu, respeita no hadomi malu, no servisu maka'as ba hadi'ak povu tomak nia moris-di' ak, no hametin soberanía Estadu direitu demokrátiku.

Husu mós ba aswain sobrevivente sira atu hatudu ezemplu di'ak nafatin ba alin sira, oan sira, beioan-sira ho domin, respeita malu, solidariedade no fraternidade, hodi hamutuk halo Timor-Leste nakfilak ba fatin moris ho dame, estabilidade no kontribui ba dezenvolvimentu sustentável.

Problema seluk mak, to'o ohin loron saúde públika sai preokupasaun boot tebes ba ema hotu liliu ba Estadu Timor-Leste, tanba númeru kazu Covid-19 no ninia variante aumenta ba bei-beik.

Ho ida ne'e, rekomenda no apela ba kompatriota sira, ba sidadaun tantu Timoroan no estranjeiru sira iha Timor-Leste, atu haktuir ba regra sanitária prevensaun Covid-19 nian.

Tanba regra ne'ebé fó sai husi Organizasaun Mundiál Saúde (OMS) no Ministériu Saúde (MS) hanesan uza máskara, fasi liman ho sabaun no hado'ok malu pelu menus metru ida, atu nune'e salva ida-idak nia-an rasik, salva ema seluk, kolabora ho pesoál saúde sira no pesoál seluk iha liña frente sira hodi salva nasaun husi moras ne'e. (*)