Sidadaun timoroan hirak ne'e, autoridade seguransa Indonézia liuhusi Kapolres Belo deporta iha loron kinta (19/08) liuhusi Fronteira Batugade.

"Ohin (19/08) ofisialmente autoridade seguransa Indonézia nian kompostu husi Kapolres Belu, Dandim no Migrasaun Indonézia nian, entrega hikas ita-nia sidadaun timoroan ho totál hamutuk ema na'in-352 ne’ebé atravesa ilegalmente ba Indonézia hodi tuir graduasaun ba Grupu Arte Marsiál PSHT”, informa Komandante Unidade Patrullamentu Fronteira (UPF), Superintendente Euclides Belo, liuhusi karta komunikadu ne'ebé www.tempotimor.com asesa, sesta (20/08).

Sidadaun timoroan hirak ne’e UPF halo ona identifikasaun no daudaun entrega ona-ba Sentru Integradu Jestaun ba Krize (SIJK) transporta ba Dili hodi kumpri kuarentena durante loron 14 nia laran hafoin prosesu tuir lei ne’ebé vigora, tanba kontra ona regra Estadu Emerjénsia (EE) hodi hakat sai husi Timor-Leste ba Indonézia ilegalmente durante pandemia Covid-19.

Membru PSHT hamutuk na’in-352 ne’ebé antes ne’e hetan kapturasaun iha área Atambua-Nusa Tengara Timur (NTT) tanba hakat fronteira terrestre liu dalan ilegál hodi partisipa serimónia graduasaun hasa’e sintu iha Indonézia.

“Ami servisu koordenadu ho autoridade sira ne’ebé servisu iha liña fronteira, espesialmente ba Sentru Integradu Mota Ain, durante prosesu tomak ami kumpri ona regra no prosedimentu tuir protokolu ne’ebé estabelese hela iha ita-nia rain”, hatete nia.

Dadaun parte UPF mós simu estudante na'in-109 husi Indonézia ne’ebé deside fila mai Timor tanba pasaporte kaduka no viza mate inklui mós timoroan na'in-36 ne’ebé la konsege ba servisu iha Inglaterra tanba konsidera Indonézia kategória zona mean ba Covid-19. (*)