“Ha’u ejize nafatin nu’udar veteranu, nu’udar sidadaun no nu’udar reprezentante povu, Governu tenke preokupa ita-nia forsa armada. Tanba Forsa Libertasaun Nasional Timor-Leste (FALINTIL) ninia kontinuasaun mak Forsa Defeza Timor-Leste (FDTL) ne'ebé Governu tenke preokupa ninia modernizasaun ho nia dezenvolvimentu atu lori nafatin obra ne'ebé FALINTIL uluk husik, atu moderniza ho espiritu ida ne'ebé FALINTIL uluk husik, agora sira sei hakarak kontinua nafatin e kontinua duni”, dehan nia iha PN, kuarta (18/08).

Tanba sira ne'ebé iha tinan 1975 kaer kilat agora barak iha forsa armada hanesan Jenerál Lere Anan Timur, ho Brigadeiru sira, no ema ne'ebé Funda FALINTIL ne'e líder sira, mate hotu ona, no sira ne'ebé sei moris mak Sekretáriu Jeral Fretilin nian Mari Alkatiri ho sira seluk.

Ejisténsia Forsa Armada Nasionál Timor-Leste ne'e ejiste iha loron 20 fulan-agostu tinan 1975, bainhira povu timoroan tomak hamriik hafoin mosu insurisaun jerál iha loron 15 fulan-agostu tinan 1975 iha Aileu.

Iha insurisaun jerál ne'ebé mak konsege ejiste hanesan loke dalan ba povu no timoroan hamri’ik halo asaun militar hasoru UDT, ne'ebé iha momentu ne'e timoroan lubuk ida mak brani aseita risku hothotu.

Tanba insurisaun armada ne'e hanesan golpe ida, ne'ebé sira konsege halo iha Munisípiu Aileu, no iha momentu ne'e, Militar ezertu portugés halo ninia sentru instrusaun hodi treinu militar foun sira atu hanesan hola parte iha ezertu portugés.

Nune'e, insurisaun armada ne'e sira hamriik uluk hasai kilat iha Aileu, foin loke 20 maiu, maibé ne'e mós lori tempu naruk, komesa iha loron 15 de agostu 1995, durante loron lima, hafoin kontrola Aileu, sein ema ida mate.

Ba insurisaun armada ne'e bele dehan kontinuasaun ida husi 25 abril kona-ba revolusaun das flores ninian, tanba iha Aileu nein malae no nein timoroan ida mak mate, ne'ebé konsege dezarma malae sira hotu iha ne'eba.

Hafoin ida ne'e, organiza filafali FALINTIL sira hodi halo operasaun, no momentu ne'e Rogeiro Lobato mak hanesan Komandante FALINTIL.

Tan ne'e, nu’udar veteranu hakarak fó hanoin ba Governu tanba dadauk instituisaun barak mak preokupa, liliu instituisaun Defeza Nasionál, tanba sempre hatudu korazen determinasaun aseita risku hothotu.

Ba kontinuasaun esperitu ida ne'e, presiza formasaun, no buka atua tau ida ne'e iha ida-idak nia neon no prátika, maibé atu hametin ne'e presiza instituisaun hothotu preokupa.

Hahú husi loron 20 fulan-agostu 1975, mai iha 20 agostu 2021, ejistensia FALINTIL konsege kompletu tinan 46, maibé sente triste bainhira hateke ba kotuk tanba husi ne'ebá mai to'o 1999, Timor-Leste lakon nia veteranu di'ak barak mate ba ukun rasik-an. (*)