Print this page

F-FDTL Sei Selebra Aniversáriu FALINTIL ho Tour ‘Dalan Ba Dame’

By August 13, 2021 2641
Komisaun Organizadora ba Komemorasaun Aniversáriu Falintil 20 Agostu 2021, informa ba públiku kona-ba Tour FALINTIL nian, iha Kuartel Jernerál F-FDTL, Fatuhada, sesta (13/08). Komisaun Organizadora ba Komemorasaun Aniversáriu Falintil 20 Agostu 2021, informa ba públiku kona-ba Tour FALINTIL nian, iha Kuartel Jernerál F-FDTL, Fatuhada, sesta (13/08). Foto Tempo Timor

Tempotimor (Dili)-Komandu Falintil-Forsa Defeza Timor-Leste (F-FDTL), iha sesta (20/08) semana oin, sei komemora nia aniversáriu FALINTIL ba dala-46 liuhusi atividade Tour ho tema ‘dalan ba dame’, hodi vizita ba fatin istóriku durante luta ba libertasaun iha Timor-Leste.

“Iha tinan ida ne'e, dala-ida tan, Falintil-Forsa Defeza Timor-Leste, komemora loron Falintil iha dia 20 de Agostu iha tinan ne'e. Komemorasaun ne'e sei prienxe ho atividade mak hanesan, Tour Falintil, ne'ebé ami ho tema (dalan ba dame)”, informa Prezidente Komisaun Organizadóra ba Aniversáriu Falintil, Tenente Coronel de Infantaria, Constantino Morreira, iha Kuartel Jenerál Fatuhada, sesta (13/08).

Aleinde ne'e, FALINTIL Tour, sei iha mós serimónia solene, missa agradesimentu, no sei kari ai-funan iha Jardím dos Herois, enseramentu Tour FALINTIL nomós promosaun diviza ba kadete sira.

“Falintil Tour 2021, ne'ebé ami ho tema dalan ba dame, ho nia objetivu mak vizita fatin istóriku sira kona-ba asaun golpe kontra golpe ne'ebé ami bolu dehan gruerra sivíl, nomós diferensia interna das FRETILIN, FRETILIN ho FRETILIN mak kontra malu, ne'ebé akontese iha territóriu nasionál, e sei ba hatuur mós plaka iha fatin istóriku sira ne'e”, hatete nia.

Husi lansamentu plaka hirak ne'e, hodi identifika no memoriza vítima sira ne'ebé sai vitima ba situasaun sira ne'e.

Ho loron importante ne'ebé Falintil Asswain sira ho sira-nia aten brani hodi defende soberania to'o Timor-Leste sai nasaun independensia ida.

Tanba ne'e, komisaun organizadora dia 20 de Agostu, loron Falintil ba dala-46, hato'o ba povu iha Timor-Leste tomak katak, serimónia ba tinan 2021, sei komemora iha kurtel Jenerál Fatuhada, no iha serimónia sei prezide husi Prezidente Repúblika Timor-Leste, Francisco Guterres ‘Lú Olo’, nomós órgaun soberanu seluk.

Tuir oráriu atividade Tour Falintil ne'e, sei hahú iha loron domingu (15/08) husi kuartel jenerál Fatuhada Dili, no abertura iha Palásiu inklui hala'o pequeno altu, hafoin liuba munisípiu Manatutu, iha área Behedan nian sei halo tan pequeno altu ida, no liu mós ba Postu Administrativu Laklo.

Hafoin kontinua ba diresaun Munisípiu Baukau, iha (15/08) to'o iha baze militár komponente Baukau, sei grande altu iha ne'ebá. Iha dia 16 dadeersan sei ba Munisípiu Lautein, to’o iha neebá, iha antigu baze primeiru batallaun Falintil-FDTL tour sei halo pequeno altua iha ne'ebá, depois liu mós ba Postu Administrativu Iliomar, sei grande altu.

Iha loron tersa (17/08), four FALINTIL sei liu ba Vikeké, to'o iha Uatukarbau sei halo pequeno altu, hafoin kontinua ba Uatulari hodi halo grande altu.

Nune’e mós FALINTIL Tour sei hahú fali viájen iha loron kuarta (18/08), hodi kontinua ba Munisípiu Manufahi, sei halo grande altu, no loron kinta (19/08), ekipa Tour Falintil filafali mai kapitál Dili hodi prepara partisipa iha serimónia aniversáriu Falintil nian iha sesta (20/08).

Hafoin iha kuarta (25/08), ekipa Tour Falintil filafali ba Likisá, hodi halo grande altu iha área Darulete, nune’e iha loron kinta (26/08) tour kontinua ba Munisípiu Bobonaru-Maliana.

To'o iha área Damalara, tour sei pequeno altu iha ne'ebá, tanba iha pequeno altu ne'e iha atividade ida ne'ebé enkaixa mós iha tour lansamentu primeiru pedra ba baze militár. Husi Damaralan, tour sei kontinua ba munisipiu Maliana e grande altu iha ne'ebá.

Iha loron sesta (27/08), ekipa Tour Falintil kontinua ba Munisípiu Covalima hodi halo grande altu, hafoin iha loron sábadu (28/08), tour ho viajen halo pekenu altu iha Ainaru, hodi kontinua viájen ba Aileu, halo mós grande altu, molok domingu (29/08) filafali mai Dili. (*)

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items