“Horikalan iha oras tuku 11, ita-nia membru sira husi UPF Companhia Alfa Postu Tunubibi kaer joven na’in-4 iha área mota laran ne’ebé tenta ultrapasa fronteira ilegalmente ba Indonézia”, informa Komandante UPF, Superintendente Euclides Belo, iha pájina ofisial Servisu Relasaun Públika, Ministériu Interior ne'ebé www.tempotimor.com asesu, tersa (10/08).

Sidadaun hirak ne’e, UPF kaptura liuhusi operasaun ne’ebé halo iha liña mean fronteira terrestre Timor-Leste ho Indonézia.

Ema na'in-4 daudaun ne’e membru UPF sei halo identifikasaun hafoin entrega ba Komandu Munisípiu Bobonaru halo investigasaun no sei entrega ba ekipa saúde Covid-19.

Kona-ba asuntu seguransa iha liña fronteira, komandu nafatin esforsu servisu hamutuk ho unidade Batallaun Ordém Públika (BOP) no Kompaña Operasaun Espesiál (COE) hodi asegura situasaun hakmatek iha liña fronteira.

“Ami simu orientasaun husi Komandu Jerál PNTL hodi halo alerta no halo prevensaun másimu hodi garante liña fronteira sai fatin seguru ba ema hotu liliu iha Maliana, Suai to’o Oekussi”, dehan nia.

Tanba ne’e, husu ba sidadaun hothotu ne’ebé hela iha fronteira atu halo kooperasaun di'ak ho PNTL kontribui ba seguransa públika. (*)