“Ida ne'e planu ne'ebé mak husi Sua Exelénsia komandante jerál nian, haree ba ema hotu nia preukupasaun ba área fronteira nian. Ita hatene katak, ita hotu tenke asegura fronteira, tanba oras ne'e dadauk iha movimentu ilegál ne'ebé mak maka'as tebtebes iha fronteira”, hatete Komandante Operasaun PNTL, Superintendente Xefe, Pedro Belo, iha Kuartel Jerál Kaikoli, segunda (09/08).

Tanba ne'e iha misaun ida ne'ebé klaru, hodi bele koopera hamutuk ho membru sira iha fronteira, ne'ebé sei orienta direta husi komandante sira ne'ebé karrega iha parte fronteira nian.

Membru ne’ebé apoiu seguransa iha fronteira reforsu husi Komandu Jerál Kaikoli, hodi apoiu Unidade Polisia Fronteita (UPF), ho Compañia Operasaun Especial (COE) tanba númeru membru iha fronteira limitadu atu destaka ba kada Postu Seguransa sira.

Tanba ne'e mak reforsa husi komandu jerál pelutaun ida ne'ebé mak atu reforsa tan ba parte fronteira nian, antes ne'e, iha ona Unidade Espesial ne'ebé koloka uluk.

“Sira hotu sei submete ba iha ne'ebá, hodi nune'e bele asegura ita-nia fronteira ne'e ho di'ak. Ne'ebé, ohin ekipa ida ne'e ho nia misaun ida kee klaru tebtebes, sira sei la'o ho serbisu, sira sei la'o ho sentidu de estadu nian, sira sei hala'o serbisu e sira sei hatudu rezultadu ne'ebé mak di’ak ba povu no rai ida ne'e”, afirma nia.

Aliende ne’e Variante foun Delta ne'ebé mak oras ne'e dadaun iha nasaun viziñu Indonézia maka'as nomós tuir informasaun katak, balu mós tama mai iha Timor-Leste.

“Ita atu asegura fronteira ho metin para ema sira labele halo movimentu tun sa'e iha parte fronteira nian. Maibé, sira ne'ebé mak ba ne'e ekipa ida ba uluk tiha, iha pelutaun ida ne'ebé ba, e tempu badak sei tuir tan, atu ema hothotu iha fronteira ne'eba bele sente seguru e mós labele lori moras aat ne'e mai”, dehan nia.

Diretór Ezekutivu ONG Fundasaun Mahein (FM), João de Almeida hatete, fronteira terrestre presiza duni reforsa husi autoridade seguransa sira, tanba situasaun ida ameasdu, liliu pandemia Covid-19, ne'ebé hamosu krize saúda públika iha rai tomak.

Maske nune'e, presiza partisipasaun komunidade sira nian ne'ebé hela besik iha fronteira terrestre, nomós husu ba autoridade lokál sira atu konsiénsializa komunidade sira atu labele hakat fronteira ilegál.

“Atu prevene movimentu ilegál sira iha liña fronteira, ita-nia estadu hola medida atu kontinua kontrolu ho rigór iha fronteira, ho aumentu númeru forsa seguransa iha fronteira. Maibé, atubele halo prevensaun ida ke di'ak liu partisipasaun sidadaun sira-nian, no autoridade lokál sira iha fronteira”, dehan nia.

Tanba iha regra no medida sira kona-ba ezekusaun Estadu Emerjénsia hatur, sidadaun sira ne'ebé hakat fronteira ho ilegál, estadu sei kriminaliza sira hodi prosesa tuir lei, tanba hamosu atus dezobidiénsia. (*)