Tuir informasaun ne’ebé www.tempotimor.com asesu liuhusi pájina ofisiál servisu relasaun públika, kinta (05/08), Komandante UPF, Superintendente Euclides Belo hatete, sidadaun hirak ne’e UPF kaptura liuhusi operasaun Postu Alfa ne’ebé destaka iha fronteira terrestre Timor-Leste ho Indonézia atu sa'e sa'e sintu iha ne'ebá.
“Ohin dader ita-nia membru sira husi UPF Companhia Alfa postu Tunubibi kaer joven na’in-2 ho ojek no foin daudaun kaptura tan joven na’in-5 inklui ema ida fasilita hodi tama iha área ponte Nunura ne’ebé tenta ultrapasa fronteira ilegalmente ba Indonézia hodi sa’e sabuk”, informa Euclides Belo iha Kuartel UPF, Nu Badak.
Husi ema na’in-7 ne’e na-in-rua entrega ona ba eskuadra PNTL Atabae no na’in-5 seluk entrega ona ba eskuadra PNTL Batugade hafoin halo hela identifikasaun hotu sei entrega ba ekipa saúde Covid-19 hodi halo teste saúde no sei submete ba kuarentena hodi evita propagasaun.
“Loron rua liuba ami hamutuk ho Vise Ministru Interior mós kontinua sosializa informasaun ba populasaun iha liña fronteira hodi informa karik hetan ema oin foun ruma iha sira-nia let no evita halo kontaktu ho komunidade sira husi Indonézia”, dehan nia.
Ba assun kaptura ne’e nu’udar parte ida hodi evita tranzmisaun peste letál Covid-19 tanba nasaun viziñu hanesan Indonézia kontínua eziste propagasaun surtu Covid-19.
Maibé kona-ba asuntu fronteira ne’e presiza sidadaun hothotu nia kontribuisaun ba seguransa hodi apoiu PNTL no FALINTIL-Forsa Defeza Timor-Leste (F-FDTL).
Aliende ne’e apela mós ba sidadaun sira ne’ebé hela iha fronteira atu halo kooperasaun di’ak ho PNTL karik iha ema foun balu halo movimentu informa lalais ba parte seguransa. (*)