“Konferensia imprensa atu dehan Lere naokten ida ne'e ha'u sei responde maibé dehan prezidente ne'e prestiziu ondra ida mai ha'u, siknifika sira depozita konfiansa mai ha'u, entaun ne'e demokrasia husik sira halo ba, ha'u bele fiar katak la'ós ida ne'e de'it, dala ruma husi parte seluk mós sei halo, parte Oekussi mós sei halo, iha fatin hothotu purque sira relasaun emosionál entre ha'u, hanesan irmão Lú OLo, Taur, relasaun emosionál sempre iha”, dehan Lere hafoin reuniaun ho Prezidente Repúblika, Francisco Guterres 'Lú Olo' iha palásiu prezidensiál Bairopite, kuarta (28/07).
Maske Joventude Munisípiu Lautém (JML) la kontaktu ba nia maibé nia rasik sempre hatete ona ba joventude sira katak, seidauk hanoin to'o kandidata-an ba Prezidente Repúblika tanba atu kandidatu la kandidatu sei to'o nia tempu no konferénsia imprensa joven sira-nia direitu tomak.
Tanba Joventude Munisípiu Lautém ne'ebé apoiu ne'e dalaruma sira ne'ebé inan-aman iha relasaun ho nia, abanbairua Oekussi halo konferénsia imprensa tanba uluk ligasaun ho nia, bainhira sira parte seluk, Bobonaro, Suai halo ne'e mós uluk halo ligasaun.
“Ita hatete, ita iha mundu ne'e la'ós ema hothotu gosta ita la’e, balu gosta balu la gosta, ne'e mak eleisaun iha ne'e, ne'ebé ha'u hanoin katak ida ne'e ha'u la tau problema”, dehan nia.
Relasiona ho joventude sira ne'ebé apoiu ne'e la prezudika ba nia servisu tanba servisu la’o di’ak hodi lidera forsa defeza.
“Agora problema ha'u-nia mak ha'u la bele involve iha prátika polítika”, haktenik Lere.
Antes ne’e, reprezentante JML, Ventura Pino hatete, maske Tenente Jenerál Lere sei lori pasta militár nian maibé nu'udar Juventude Munisípiu Lautém hakarak apoiu Lere ba kandidatu an ba Prezidente Repúblika iha Periódu tinan 2022-2027
“Maske ami seidauk iha konversa verbal ho tenente jenerál ba kandidatura ne'e, maibé ami nu'udar JML iha inisiativa rasik no ho hanoin ida katak, só Tenente Jenerál Lere mak bele lori prosesu tomak ne'e ho di'ak ba dezenvolvimentu nasaun ida ne'e”, dehan nia. (*)
