Tanba laiha ekipa saúde ne’ebé destakadu hodi halo dezinfekta ba sasán, ema ho transporte sira ne'ebé tama sai iha pontu entrada sira no polísia PNTL mesak hala'o servisu ho dobru.

“Ita la'ós fatin Tasitolu de'it, Kasnafar mós hanesan, Metinatu mós hanesan, ita laiha saúde ida ne'ebé mak iha ne'ebá. Iha lei ne'e dehan katak, kualker karreta sé de'it atu tama, tenke dezinfekta ne'e, saúde mak halo dezinfekta buat ne'e hela, ne'e lei mak ko’alia hela. Maibé, durante ne'e polísia mak halo servisu hela iha terrenu, laiha saúde ida iha ne'ebá. Sira ne'ebé voluntáriu balu mak servisu hamutuk ho PNTL servisu iha ne'ebá, maibé laiha saúde”, dehan Segundu Komandante Munisípiu Dili, Superintendente Polísia, João Sancho Pires, iha kaikoli, kinta (22/07).

Tanba laiha prezensa ekipa saúde sira nian liuhusi, mak halo membru polísia sira tenke halo servisu saúde nian hodi halo dezinfektasaun ba ema no transporte sira ne'ebé ultrapasa husi pontu entrada Tasitolu, Kasfar ho Metinaru.

“Tanba ne'e mak servisu iha ne'ebá ne'e, dala-ruma polísia mak foti tomak ona, ne'ebé ema satiadu hela polísia. Maibé hakarak ka lakohi, polísia servisu hela iha kraik. Ne'ebé saúde sira dezinfekta laiha”, dehan nia.

Maibé, ko’alia ona ho parte Sentru Integradu Jestaun ba Krize (SIJK) hodi halo koordenasaun oiná mak bele koloka mós ekipa saúde nian hamutuk ho PNTL iha pontu entrada sira.

“Ministériu ida-idak tuir loloos hatene nia servisu atu tun de'it, maibé ita-nia komandu mós ko’alia tiha ona ho sira, hodi nune’e sira bele tau hela. Maibé to'o agora sira nafatin la tau. Mais se tuir loloos ne'e sira tenke tau para bele servisu hamutuk ho ami hela. Mais, sira iha ka laiha mós, polísia sei nafatin hala'o servisu iha terrenu”, afirma nia. (*)