“Prosesu selesaun rekrutamentu ba membru F-FDTL foun hotu ona, sira ne'ebé corona seidauk, mais ne'e na’in hira de'it, maibé ha'u bele dehan se fulan ida ne'e, la anunsia pelumenus prinsipiu fulan-Agostu anunsia ona, se mak liu no se mak la liu”, dehan Lere iha palásiu prezidensiál Bairopite, kuarta (21/07).
Maske to’o agora seidauk simu relatóriu husi komisaun rekrutamentu ninian tanba foin mak konvoka atubele prezenta relatóriu sei hatama lista kandidatu sira ne'ebé apuradu depois mak forsa armadas estuda, sé mak liu no sé mak la liu tanba ida ne'e militár.
“Sé mak la liu labele dehan, tanba saida mak la liu di'ak liu nonok ba toba ka halo servisu seluk, ne'e la'ós ONG ruma be o mai atu karotek, para o hatene laiha, sé mak la liu ne'e la liu ona no sé mak liu ne'e liu ona, ida ne'e só Komandu mak hatene, maibé to’o agora seidauk tanba foin daudauk ita feriadu loron rua tutuir malu servisu laiha orsida lokraik ka aban sira hatama lista, sira apuramentu nian ne'e”, afirma nia.
Preparasaun ba membru ne'ebé pasa ba forsa foun F-FDTL formasaun ba sira hanesan baibain treinu báziku nafatin laiha mudansa, hafoin treinu báziku hotu bainhira pasa ona militar, mak iha ona espesialidade hanesan balun ba forsa espesiál, polísia, komandu, navál, infantaria.
Antes ne'e, Ministru Defeza (MD), Filomino Paixão informa ona iha semana kotuk iha loron kuartu (16/07) katak, rezultadu teste membru F-FDTL ba testu fíziku ikus totál hamutuk 2400 atu apura 600 nune'e semana oin nia rasik sei simu relatóriu hodi fó sai rezultadu. (*)
