Tanba kazu hamutuk 244 ne'e, rejísta iha tinan 2020 hamutuk 194 no iha tinan 2021 iha kazu 50.

“Iha 2020, ita iha 194 prosesus. Agora, 2021 janeiru to'o iha agora dadauk ne'e, ita bele dehan pur-volta de, kuaze 50 ida, delegasaun kompeténsia. Kazu sira ne'ebé mak tama iha PCIC nia kompeténsia, kazu sira natureza kompleksu, gráve. Gráve hanesan omesídiu, violasaun seksuál, falsifilasaun dokumentu, burla (penipuan) sira ne'e ho nia valor altu ema bolu burla agravadu. Ida ne'e mak delega mai PCIC”, informa Diretór Nasionál PSIK, Vicente Fernandes Brito, iha Kaikoli, sesta (16/07).

Husi númeru kazu hirak ne'e, iha 20-resin mak PSIK konsege prosesa ona, tuir prazu tempu ne'ebé Ministériu Públiku delega hodi halo investigasaun.

"Kuandu Ministériu Públiku delega mai iha PCIC, iha ne'ebá iha prazu kedas, nia termina ne'e, semana rua, 30 dias, 60 dias. Agora, PCIC ninia investigadór sira, ami PCIC kumpri mak prazu ne'e, ne'ebé ita bele dehan termina ne'e, kala iha 20 itál prosesus mak termina”, dehan nia.

Maske nune'e, iha mós kazu balu sira husu atu halo prolongasaun ba nia prazu tempu atubele rekolla tan indísius prova sira, tanba seidauk kompletu.

“Ita presiza husu tan prazu, prolonga prazu para ita bele halo investigasaun komplementár iha ida inkéritu”, esplika nia.

Aleinde ne'e, PSIK mós keixa husi komunidade kona-ba kríme online (Cybercrime) ninian, tanba ema ofende malu liuhusi ID (Identidade) Facebook ne'ebé falsu.

“Maibé, ita presiza mak ne'e, ami tenke halo, será quee ida ne'e kríme ka la’e?. Sé la'ós kríme, ami labele remete ba ministériu públiku. Kuandu, kríme, ami halo kedas autonotísia de kríme, entrega ba ministériu públiku. Sé nia defamasaun de'it, nia enjuria de'it, labele. Tanba ida ne'e tama iha natureza sivíl, iha terminasaun ketak ida, la’ós kríme”, dehan nia. (*)