“Liuhusi despaixu númeu 084/MI/VII/2021, ne’ebé públika iha jornál repúblika iha loron 9 jullu 2021, governu deside taka provizóriu postu fronteira terestre hodi evita risku propagasaun tanba konsidera variante Covid-19 Delta iha poténsia fó perigu tebes ba ema nia saúde no vida umana ba komunidade tomak iha teritóriu nasional”, dehan Vise Ministru Interior, António Armindo, liuhusi karta komunikadu ne'ebé www.tempotimor.com asesa, kuarta (14/07).
Despaixu ne’e asina husi Ministru Interior, atual Primeiru Ministru, Taur Matan Ruak, hodi deside taka provizória postu integradu fronteira terrestre hahú iha loron sábadu 10 jullu to’o loron sábadu 24 jullu 2021.
Maibé, postu integradu iha fronteira terestre nafatin funsiona iha loron segunda no kuarta entre tuku 9 dader to’o tuku 1 meiudia ba de'it atividade merkadória hanesan nesesidade báziku kontinua tama no halo tranzasaun iha área zona livre internasionál TL-RI.
“Enkuantu ba sirkulasaun internasionál so bele autoriza tama ho razaun fundamentál ba intrese públiku no apoiu umanitária nian”, hatete nia.
Enkuantu, governu foti desizaun hodi taka provizóriu postu integradu iha Fronteira Terrestre entre Timor-Leste ho Repúblika Indonézia, relasiona ho kazu konfirmadu COVID-19 varian Delta ne’ebé daudaun ne’e rejístu maka'as iha nasaun viziñu Indonézia. (*)
