“Rekrutamentu ba membru foun F-FDTL ne'e ohin ultima dia de rekrutamentu, ne'ebé hein naran taka sai, katak se mak liu, se mak laliu”, deklara Falur hafoin reuniaun ho Prezidente Repúblika, Francisco Guterres ‘Lú Olo’, iha palásiu prezidensiál Bairopite, kuarta (14/07).

Maske loron ikus ba teste, maibé sei fó espasu ba membru foun sira ne'ebé foin lalais teste swab ho rezultadu pozitivu no hela iha kuarentena atubele tuir teste.  

“Maske ohin loron ikus maibé ba sira ne'ebé foin lalais halo teste mak sira hetan pozitivu hodi bá hela kuarantena kuaze sira na’in-sanulu-resin ne'e sei teste iha loron aban (15/07)”, afirma nia.

Maibé kona-ba na'in hira mak esklui ka pasa iha teste ne'e hein de'it nia rezultadu sei fó sai, tuir vaga ne’ebé iha hamutuk 600.

“Sira ne'ebé selesaun hotu no teste hotu ona ninia rezultadu komisaun sira sei tur hamutuk, depois fó avaliasaun, aprovasaun, hafoin sira sei submete fali ba komandu, depois komandu mak iha nia mekanizmu tur hamutuk halo avaliasaun tan hafoin halo desizaun final e taka sai”, esplika nia. (*)