"Sira na’in-14, sira mane hotu. Sira ohin mak deporta mai fali, mais Indonézia kaer kala horisehik, horibainruak, ohin 11 oras sira entrega fali mai ita. Sira ba sorin tuir graduasaun (sae-sabuk) mak polísia Indonézia kaer, deporta mai fali”, informa Komandante UPF, Superintendente Polísia, Euclides da Costa Belo, iha liuhusi telefone, tersa (13/07).
Membru GAM hamutuk na’in-14 ne'e, nu'udár sidadaun timoroan ne'ebé ultrapasa ilegál husi lutu fronteira no la deteta husi Unidade Patrullamentu Fronteira (UPF).
Sidadaun timoroan na'in-14 ne'e, ohin (13/07), maizoumenus tuku 11:00 dadeer, imigrasaun Indonézia deporta mai UPF iha fronteira Batugade hodi prosesa tuir lei RDTL.
Maibé, servisu Imigrasaun ho UPF sei koordena ho Komandu PNTL Munisípiu Bobonaru, hodi entrega ba Sala Situasaun Sentru Integradu Jestaun Ba Krize (SIJK) hodi kumpri kuarentena loron 14 hafoin kontinua ba prosesu seluk tuir mai.
"Prosesu ba sira, tuir prosedimentu saúde nian ne'e, sira kumpri tiha lai kuarentena, depois mak sei prosesu sira tuir prosedimentu legál ne'ebé mak iha ne'e, entrega ba investigasaun kriminal nasionál”, dehan nia. (*)
