Print this page

Kazu Omisidiu Iha Beto Barat, PNTL ‘Lahatene Paradeiru’ Suspeitu

Matebian Membru PNTL, Primeira Sarjentu Rosalina dos Santos ne'ebe deskonfia oho husi nia laeen iha Beto Barat. Matebian Membru PNTL, Primeira Sarjentu Rosalina dos Santos ne'ebe deskonfia oho husi nia laeen iha Beto Barat. Foto Suplay

Tempotimor (Dili)-Komandu Jerál Polísia Nasionál Timor-Leste (PNTL) dadaun ne’e seidauk hatene paradeiru suspeitu AS ne’ebé envolve kazu omisidiu hodi oho nia fen husi membru Polísia Nasionál Timor-Leste (PNTL), Primeira Sarjentu Rosalina dos Santos iha Beto Barat, Aldeia Anin Fuik, Suku Madohi, Postu Administrativu Dom Alexo, Munisipiu Dili, segunda (06/07).

Tanba ne’e Komandante Jerál PNTL, Komisáriu Faustino da Costa husu ba suspeitu AS atu entrega-an ba parte seguransa atubele supmete ba justisa.

Kazu membru PNTL Rosalina dos Santos prosesu investigasaun la'o hela, klaru autór ne'ebé oho nia feen rasik ne'e nafatin husi família, vítima mós PNTL husu tantu suspeitu nia família rasik atu di'ak liu koopera atu suspeitu bele entrega-an.

“Ohin ita-boot sira husu suspeitu ne'e kaptura ona ka lae?. Tanba ne'e mak desde bainhira akontesementu ne'e ita ezije ba se de'it, se di'ak liu ne'e nia entrega-an ba parte PNTL ka iha ne'ebé”, hatete Komisáriu Faustino ba jornalista sira hafoin sorumutu ho Prezidente Repúblika, Francisco Guterres 'Lú Olo', iha palásiu prezidensiál Bairopite, kinta (08/07).

Matebian ninia mate ne'e PNTL sei organiza atu desloka matebian ba ninia munisípiu ka moris fatin.

PNTL sente triste tanba asuntu família nian, membru PNTL ida tenke hakotu vida.

Antes ne’e, membru PNTL ho postu primeira sarjentu ho naran Rosalina dos Santos iha loron tersa (06/07) maizomenus tuku 23:30 kalan mate iha nia rezidensia Beto Barat, Aldeia Anin Fuik, Suku Madohi, Postu Administrativu Dom Alexo, Munisípiu Dili ne'ebé deskonfia sona husi suspeitu AS nu'udar laen kaben.

Mosu akontesimentu ne'e suspeitu halai ses tiha ne'ebé ekipa buka nafatin koordena ho família, liliu família autór atubele entrega-an ba polísia, maibé to’o agora seidauk hatene ninia paradeiru. (*)

 

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items