Tanba ne’e, Vise Ministru Interiór (MI), António Armindo, iha loron kurta (07/07) ofisiálmente loke postu refere iha Fronteira Batugade hodi halo kontrolu ba transporte sira ne’ebé liu husi fronteira.
“Ita ofisialmente loke ita-nia Postu Tránzitu iha servisu integradu iha fronteira ne'e atu implementa de'it ita-nia dekretu lei númeru 28/2017, ne'ebé mak ohin ita hahú implementa ona, destaka ona ita Postu tránzitu sira iha ne'e atubele kontrol, regula transporte sira ne'ebé mak tama sai iha territóriu nasionál Timor-Leste nian, ne'e inklui mota-ain, ho Salele depois sei hanoin ba RAEOA ninian”, dehan António Armindo, iha Fronteira Batugade, kuarta (07/07).
Maske limitasaun ekipamentu ne'ebé membru PNTL sira hasoru, maibé durante servisu iha fronteira, membru sira sei integra ho autoridade aduaneira (alfándega) sira, inklui sei instala mós komputadór nomós liña internet ne'ebé apoiu husi Ministériu Finansas (MF).
Nune’e Komandante Jerál PNTL, Komisáriu Polísia, Faustino da Costa esplika, instalasaun Postu seguransa ba polísia husi tránzitu ne'e, liuhusi kooperasaun ho MF, hodi haforsa servisu kontrolu iha lutu fronteira.
“Ohin inaugura, ohin mós ita hahú koloka iha ne'e, ne'ebé iha kedas lansamentu ida, stiker balu que ita tau ona ba karreta sira ne'ebé tama. Siknifika ohin ba oin ne'e, sira halo ona servisu iha ne'e”, informa Faustino.
Ho Postu Tránzitu, nu'udár postu dahuluk ne'ebé instala iha liña fronteira Motaain-Batugade, maibé tuir planu sei instala mós iha Postu Salele, iha Mota-masin nian hodi koloka mós membru sira atubele halo kontrolu ba movimentu sira transporte terrestre nian.
Tanba ne'e, sidadaun hirak ne'ebé hakarak tama sai ho sira-nia transporte, tenke tuir lei númeru 28/2017, ne'ebé regula katak, tama mai área Timor-Leste, loron ida, sei selu US$2, loron rua selu US$3, no loron lima selu US$30, no sei taka mós stiker iha karreta ho motorizada.
Postu refre sei sai mós postu permanente, hodi koloka membru hamutuk na'in-6 atubele hala'o kna'ar tuir oras servisu nian, maibé transporte mós tenke tama la tuir oras, bainhira la tuir oras sei autoriza tama. (*)
