Tempotimor (Dili)-Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur hatete, Polísia Nasionál Timor-Leste (PNTL) ho FALINTIL-Forsa Defeza Timor-Leste (F-FDTL) mesak sei la bele rezolve atividade ilegál iha fronteira tanba propriu komunidade rasik mak fasilita ema tama no sai.

“Ha'u sempre hatete ba Xefe Estadu katak, polísia, forsa de'it la rezolve problema, tanba ita-nia propriu komunidade ne'ebé iha liña fronteira mak fasilita sira tama sai, ida  ne'e mak uluk kedas ha'u ko'alia ona katak, ita tenke reforsa seguransa fronteira ninian, reforsa mós nia vida”, dehan Lere hafoin reuniaun ho Prezidente Repúblika, Francisco Guterres ‘Lú Olo’, iha palásiu prezidensiál Bairopite, kuarta (07/07).

Tanba ema ne'ebé ultrapasa ilegál bainhira kaer ba kuarentena, maibé fó mós ba sira ne'ebé fasilita hanesan populasaun sira ne'ebé hela iha fronteira.

“Ha'u hanoin katak, presiza konsiénsia tanba buat moras ida ne'e la'ós buat ida halimar, mai dala ruma família ida mate mohu mós iha, dala ruma hela ida de'it mós ih”, hatete nia.

Maibé seguransa iha fronteira daudaun ne'e Polísia ho F-FDTL sei reforsa no kria kondisaun, liliu alojamentu ba sira no kondisaun sira seluk tanba sira moris izoladu.

Kona-ba Prezidente Repúblika, Francisco Guterres Lú Olo’, ne'ebé veta orsamentu remuneratóriu ba liña frente, laiha impaktu ida, tanba impaktu bainhira la hán maibé bainhira hán nafatin laiha impaktu.

“Prezidente Repúblika veta orsamentu remoneratóriu ba liña frente ne'e sempre iha razaun mak veta, Xefe Estadu la'ós veta naran-naran de'it”, dehan Lere. (*)