Tuir kronolójia, iha loron 23 fulan-juñu tinan 2021, maizumenus oras dadersan, matebian sai husi uma hodi ba hala’o ezersísiu fízika (jinástika), maibé mosu dezastre ba nia, tanba hetan soke husi motorista ida ho nia karreta privádu iha área Kuluhun, to'o mate fatin.

Hafoin insidente ne'e mosu, suspeitu lakohi koopera ho justisa no deside halai lakon, to'o matebian hakotu iis hafoin suspeitu ba fali entrega-an iha PSIK, konsege detein suspeitu iha oras 72 laran, ikus mai husik lívre.

“PSIK labele asegura nia (suspeitu) hanesan ne'e, tanba sé imi asegura de'it hanesan ne'e, berarti (siknifika) iha ligasaun, relasaun família ne'e iha”, dehan reprezentante família matebian, Lucia de Araújo, bainhira hato’o keixa ba FONGTIL, Kaikoli, tersa (29/06).

Hafoin akontesimentu to'o oras ne'e, família seidauk hatene informasaun ruma husi PSIK atu koñese oin husi suspeitu ne'e, maske família sira ba to'o ona iha Komandu PNTL munisípiu Dili, hodi husu tuir suspeitu ne'e, nomós to'o iha Ministériu Públiku (MP) rasik.

“Ami buka informasaun to'o ministériu públiku, to'o iha ne’ebá, doutór ida fó konsola ami katak, ida ne'e ita-boot sira fila ba, buka halo mediasaun. Agora, sé ami halo mediasaun, halo mediasaun ho sé. Tanba ema ne'e nia naran mós ami lahatene, e sein ami koñese”, dehan nia.

Aleinde ne'e, família sira mós kestiona kona-ba kna’ar PSIK nian, tanba tuir loloos Polísia Tránzitu mak bele atende kazu refere, maibé realidade PSIK iha dupla funsaun.

Tanba ne'e, a husu ba autoridade relevante sira atu buka tuir suspeitu ne'ebé soke mate sira-nia alin hodi hatán tuir lei ne'ebé vigora.

“Dehan katak iha Timor ne'e, polísia ne'e ida de'it, mais na realidade polísia ne'e rua. Ema dehan tránzitu ne'e mak halo konta ba asindente ne'e, mais realidade iha rua. Ida ne'e mak ami ezíje ba PSIK iha fuan boot, lori kazu ida ne'e ba entrega iha tránzitu para bolu ami nain ba halo mediasaun ho nia para bele koñese klean liután”, haktenik nia.

Entretantu Koordenadór Advokasia iha FONGTIL, Ivo Colimau Lay Costa hatete, tuir loloos kazu ne'e PSIK tenke enkamiña ona ba PNTL, liuhusi departamentu Tránzitu nian atubele halo investigasaun ba kazu refere.

“Ohin FONGTIL hetan vizita husi família vítima, Renato Vieira de Araujo ne'ebé mate tanba hetan asidente iha Kuluhun. Infelizmente família lamenta ho prosesu ne'ebé ke PSIK ezerse, e FONGTIL mós haree katak dehan iha ne'e iha defisiénsia ba intervensaun husi PSIK nian ba kazu ida ne'e”, dehan nia.

Kazu ne'e tutela ba iha kompeténsia PNTL nian liliu departamentu Tránzitu nian, tanba ema refere mate tanba asidente tráfiku.

“Agora, família mai informa iha FONGTIL katak, dehan suspeitu refere hetan tiha ona nia liberdade depois de hetan detensaun dentru de 72 oras de tempu. Agora, pergunta mak ne'e, tansá PSIK la enkamiña kazu ne’e ba ba departamentu tránzitu”, afirma Ivo.

Tanba iha lei orgánika PSIK nian, iha númeru 15/2014 iha artigu 06, kona-ba investigasaun kriminal nian, la mensiona PSIK ninia tarrefa kona-ba atu halo investigasaun ba asidente tráfiku.

“Ida ne'e, hatudu katak dehan, PSIK komete ona difisiénsia jurídiku iha ninia ezekusaun de papél. Agora, ema ne'e, suspeitu refere tuir loloos, submete ona ba primeiru interrogatóriu, maibé na realidade, depois de detein tiha 72 oras, ema ne'e liberta de'it hanesan ne'e”, hatete nia.

Bainhira ema ida ba aprezenta-an katak nia komete aktu ruma, iha momenta ne'ebá, indísius kríme ne'e mosu ona.

“Sá tan ita detein ema iha 72 oras ne'e, ne'e prova ida tan, katak ema ne'e komete duni kríme ruma”, dehna nia. (*)