“Iha 2020, ami rejista hamutuk 757, ne'e dadus totál. Ami konsege rezolve 317, ida ne'e aproximasaun iha, e konsege rezolve ita redúz to'o de'it kazu naton mak ita iha hela”, informa Diretór DNPKK, António Viegas, iha salaun Ministériu Interior (MI), Vilaverde, kuarta (23/06).
Husi kazu hirak ne'e, barak konfrontu entre jovene sira, tanba dala-ruma ho kampu servisu laiha, maibé kazu balu akontese entre Grupu Arte Marsiais (GAM).
Husi kazu sira ne’e, DNPKK halo aproximasaun ho parte rua, ho prezensa autoridade lokál, oinsá atu haree no akompaña, tanba iha matadalan atu haree ba asuntu ne'e.
Tanba durante ne'e, kazu barak liu akontese iha munisípiu sira hanesan, Dili, Baukau, Maliana, maibé munisípiu sira seluk kazu númeru menus.
Tuir planu ekipa mediasaun husi DNPKK sei hala'o mediasaun ba kazu balu iha munisípiu Likisá, Ermera, Manatutu, Aileu inklui fatin seluk.
“Aleinde ne'e, halo mós ba setia Hati (SH) ho Sete-Sete, Kolimau iha Maliana, ami sei oinsá mak sira bele dame fali, depois ami sei haree mós ba Ritabou ne'ebé foin lalais akontesimentu mate, ami sei responde ida ne'e tan mós, hodi nune'e sira bele simu malu filafali”, afirma nia. (*)
