Tempotinor (Dili)- Polísia Nasionál Timor-Leste (PNTL), liuhusi Komandu Munisípiu Dili (KMD), sei halo pasa revista ka ‘embuskada’ ba adeptus husi Portugál ho França iha fatin sanulu hodi asegura estabilidade seguransa.
Tanba, dala barak ona, bainhira jogu remata adeptu sira halo komboiu iha dili laran to'o provoka malu mosu tuda malu.
Jogu ba Taxa Euro Portugal kontra Fransa iha loron 24 fulan-juñu, tuku 04:00 oras timor-leste (otl), iha estadiu Puskás Aréna, Budapeste-Hungria. PNTL mós asegura estabilidade seguransa ba adeptu sira hodi evita kríme durante jogu la’o to’o remata.
"Ekipa ne'e orsida sei halo pasa revista iha fatin sanulu, ba fatin sira ne'ebé mak identifikadu ona, no husu ba adeptu sira halo movimentu nafatin kumpre kódigu estrada ninian no respeitu mós ema seluk nia direitu”, informa Komandante PNTL Munisípiu Dili, Superintendente Xefe Polísia, Henrique da Costa, iha Salaun Sorumutuk, Ministériu Interior (MI), Vilaverde, kuarta (23/06).
Maske identifika ona fatin, maibé komandu rasik la fó sai ba públiku no konsidera hanesan segredu atu nune’e adeptu sira la’o iha estrada públiku ho kuidadu no atensaun bainhira laiha dikumentu no asesoria transporte.
Tanba ne'e, husu ba adeptu sira iha Timor-Leste (TL), atu respeitu ema husi nasaun sira seluk nia simbolu hanesan bandeira, tanba iha nasaun sira seluk sidadaun sira respeita, maibé iha TL tanba de'it fanátiku ba Jogadór balun, ikus mai uza sala ema nia bandeira hodi tara halai tun sa'e.
“Tanba ne'e PNTL sei halo atuasaun nafatin hanesan iha semana rua kotuk konsege prende motorizada hamutuk (146), agora mós eskuadra polísia sira iha Munisípiu Dili nia ne'e sei aplika hotu ida ne'e", afirma nia.
Durante operasaun, komandu Munisípiu Dili sei hetan apoiu mós husi Komandu Jerál, inklui Unidade sira hanesan BOP, UEP, ho UPF, hodi halo patrollamentu ba to'o kada bairru sira, nune'e bele evita konfrontu.
"Labele uza motorizada kanu tesin ba gás iha fatin públiku no Bairu-laran hodi gangu ema seluk nia toba liliu ema oan nurak no moras sira deskansa, ita ba provoka no halo barullu”, haktenik nia. (*)
