“Iha fulan-maiu ninian, komandu munisípiu Dili hatama koimas ne'ebé mak infratór sira selu ba kofre estadu hamutuk, US$11,925”, informa Komandante PNTL Munisípiu Dili, Superintendente Polísia, Henrique da Costa, iha kna'ar fatin Kaikoli, tersa (15/06).
Bainhira halo komparasaun entre fulan-maiu reseita ba estadu aas liu, maibé iha fulan-abril ekipa operasionál ladun hala'o atividade operasaun hodi kontrola motorista sira.
Tanba ne'e, sira ladun identifika ema ne'ebé mak vióla lei kódigu estrada, hodi aplika multa ba infratór sira, maibé iha fulan-maiu ninian mak númeru taxa ne'ebé rekolla, aas liu.
“Iha fulan-abril ninian, ita rekolla evidénsia hamutuk 158 ho koima ne'ebé mak hatama ba kofre estadu ninian, hamutuk U$6,929 dolár”, dehan nia.
Entretantu, infrasaun sira ne'ebé akontese iha fulan-maiu nia laran, hamutuk 355 maioria la uza xapa matrikula, barak mós kontra sinál tránzitu, inklui balu mós kontra ordém autoridade nian.
Maibé, iha fulan-juñu sei servisu maka'as liután hodi hasa'e atividade pasa revista ninian hodi alerta ba motorista no ema ne'ebé halo movimentu iha dalan públiku sira, labele haluha lori dokumentu, asesores motorizada ho karreta nian. (*)