“Kazu ne’e akontese iha loron segunda (07/06/2021) tuku 1:00 madrguada oras timor-leste (otl), bainhira matebian ho nia kolega sira sai hosi uma la’o ba Aldeia Samelaun, derrepente hetan ataka hosi grupu deskoñesidu hodi lori besi baku matebian monu ho kondisaun sofre kanek grave”, informa Xefe Suku Ritabou, Maximiano dos Santós de Araújo, liuhusi telefone, segunda (14/06).

Hafoin akontesimentu, grupu deskoñesidu sira halai, nune’e parte joven no família balun evakua kedas vitíma ba ospitál Maliana hodi hala’o tratamentu saúde no kontinua transporta ho aviaun mai Ospitál Nasionál Guido Valadares (HNGV) hodi hala’o tatamentu saúde.

Maibé, bainhira to'o iha HNGV ekipa médiku la konsege salva vitíma nia vida hodi hakotu iis iha loron sesta (11/06), no parte família iha loron domingu (13/06) dader tula fila vítima ba nia rai moris fatin Ritabou-Maliana.

Ho insidente ne'e, nia parte nu'udár autoridade lokál, koordena ona ho Komandu PNTL Bobonaru, Batalliaun Orden Públiku (BOP) no Komandu FALINTIL Forsa Defeza Timor-Leste (F-FDTL) halo ona investigasaun hodi buka tuir suspeitu sira-nia paradeiru.

“Agora dadaun ita seidauk indentifika loloos autór sira, tanba ita-nia autoridade seguransa sira sei halo hela investigasaun profunda hodi buka tuir suspeitu sira, tanba ita seidauk hatene suspeitu ne’e sé loos mak halo problema ne’e”, dehan nia.

Tanba ne’e polísia presiza halo investigasaun hodi kaptura suspeitu sira ne’ebé envolve, hodi evita kazu kríme omesídiu sira ne’e labele akontese bebeik iha futuru.

“Kazu ne’e kuandu ita haree loos ne’e liga ba iha grupu organizasaun arte rituál no arte marsiál,” hatete Maximiano.

Vitíma sira ne’ebé uma hetan estragu dadaun ne’e evakua ba hela provizóriu iha Komandu PNTL munisípiu Maliana komunidade nian.

“Dadaun ne’e ita koordena ho parte seguransa hodi asegura ona vitima sira ne’ebé uma hetan estragus hodi evita kazu krime ruma labele akontese”, deklara nia.

Portavóz Komandu Jerál PNTL, Superintendente Xefe, Arnaldo de Araújo deklara, Komandu PNTL Maliana liliu Komandante PNTL Bobonaro, Superintendente Polísia, António “Mauluta” rasik lidera ona ekipa hodi halo investigasaun.

“Kazu ne’e agora ita-nia polísia Maliana halo ona investigasaun hodi buka tuir autór sira ne’ebé partisipa hodi hamate vítima sei buka tuir hodi kaer hotu prosesa tuir lei,” nia hatete.

Tuir planu, família sei lori matebian ba hala’o serimónia funerál iha simitériu Santa Kruz, Maliana-Bobonaro. (*)