Tuir observasaun www.tempotimor.com iha terrenu nota, PM Taur Matan Ruak, to'o iha portu entrada Postu Administrativu Ataúro, iha tuku 11:34, maibé atu besik ba tuku 13:04 ona, seidauk bele tun husi ró laran, tanba hetan fallansu husi kapitaun ne'ebé kondúz ró ne'e, sei buka hela pozisaun atu hapara ró.

Kapitaun ne'ebé lori ró Tranship II ne'e, tenta dala-haat tutuir malu oinsá atu para ró ne'e ho di'ak, nune'e kareta sira bele sai husi ró laran, maibé to’o agora seidauk bele di’ak. Inklui tali boot ró nian ne'ebé uza hodi kesi atu dada ró ne'e mós kotu, tanba rasta husi ró nia movimentu.

Ba kestaun ne’e, www.tempotimor.com tenta dada-lia ho funsionáriu Alfádega ne'ebé destakadu iha portu Ataúro katak, kapitaun oin foun entaun to’o agora ró ne’e seidauk bele para hakmatek.

"Ró ne'e loloos para ona, mais tanba kapitaun ne'e ema oin foun ida husi Indonézia, ne'ebé agora nia sei konfuzaun oinsá atu para ró ne'e tuir nia fatin," dehan funisonáriu Alfandega ne’e iha portu entrada Ataúro nian, Sesta (11/06).

Maske nune'e, xefi Suku Villa Maumeta, Filipe Ximenes senti kontente, tamba ba dala uluk, Primeiru Ministru Taur Matan ruak hala'o vizita ba sira.

"Relasaun ho prezensa exelénsia Primeiru Ministru señor Taur Matan Ruak nian mai iha Ataúro, liu-liu mai povu Atauro ne'e, ami sente kontente tebes, tanba durante mandatu, señor PM nian, foin maka ita-nia exelénsia mai vizita Atauro, ne'e ami kontente tebes", dehan nia.(*)