Ba asuntu ne’e, Administradór Postu Administrativu Ataúro Mateus Belo katak,Primeiru Ministru (PM) ho kometiva sama ain iha Atauro tanba iha auntu importante tolu inklui inagura postu UPM iha Akrema.
"Iha atividade tolu importante iha Atauro, primeiru inagura postu UPM iha lista norte Akrema nian ne’ebé baliza ho Indonézia, segundu apoiu distribuisaun materiál ba vítima dezastre naturais, parte terseiru nian mak ko'alia kona-ba postu Atauro atu sai Munisípiu," dehan Administradór liuhusi via telephone ba www.tempotimor.com, Sesta (11/06).
Administadór ne’e subliña, postu Unidade Polisia Marítima iha Akrema hetan apoiu husi Governu Austrália liuhusi Programa Dezenvolvimentu Polísia Timor-Leste (TLPDP) ne’ebé durante ne’e sai parseiru dezenvolvimentu importante ba Timor Leste.
Entertantu PM ho kometiva hanesan Ministru Transportes no Telekomunikasaun (MTK), José Agostinho da Silva, Ministru Administrasaun Estatál (MAE), Miguel Pereira de Cravalho, Vise Ministru Interiór (VMI), António Armindo no Sekretáriu Estadu Protesaun Sivil (SEPS), Joaquim dos Reis Gusmăo foti ain husi portu Dili ba Atauro iha tuku 07:42 ho ró Tranship II ne’ebé hetan bandu hela husi Komisaun Anti Korupsaun (KAK) tanba deskonfia iha iregulariedade.
Aleinde ne’e, akompaña mós husi média nasionál sira hanesan, Rádiu no Televizaun Timor-Leste, Empréza Públika (RTTL, EP), Grupu Média Nasional (GMN), Ajénsia Tatoli, Tempotimor, Dili Post, Jornál Independente no média Timor Post, hodi halo reportajen ba atividade PM nian iha Ataúro.
Tuir planu, aban sábadu (12/06) oras dadeer, PM Taur Matan Ruak foin hala'o serimónia inagurasaun ba postu seguransa polísia ne'e, iha Aldeia Akrema, Suku Bikeli, Postu administrativu Ataúro, munisipiu Dili.(*)