“Governu mós lamenta tebetebes ho atuasaun ne'ebé mak PNTL halo, buat ne'ebé lolos ne'e tenke iha respeitu direitu umanu ema ida-idak nia tuir regra estandar ne'ebé mak iha, maibé ne'e akontese ona e ema na’in-rua mak lakon vida”, dehan Ministru Francisco Jerónimo iha plenária PN, egunda (07/06).
Asaun ne'e Primeiru Ministru, Taur Matan Ruak, foti ona medida, orienta hodi dezarma imediata membru PNTL ne'ebé mak halo asaun refere.
“Dezarma duni no oras ne'e nia iha sela, hodi hein prosesu ba tribunál tanba nia komete krime e PNTL sei haree husi parte disiplinar nia, atu hapara nia ou hasai nia husi polísia, tanba nia lori kilat hodi hamate fali povu”, hatete nia.
Maibé, sei hein rezultadu husi investigasaun investigasaun kriminal no investigasaun disiplinar hafoin foti medida tuir lei no regulamentu internu PNTL nia. (*)