Delegadu aldeia Ainitas Hun, Samuel Araujo deklara família sei halo asaun tanba la simu atetude ne’ebé membru polísia hatudu hodi hamate vítima Filomeno de Deus, no Oan mane Camilio de Deus no inklui Januário Pereira baixa hela iha HNGV.

"Ami sei lori ba tribunál, maibé ami iha planu katak ami atu halo fali hanesan desmostrasaun oan ida, hodi bele haleu Dili laran, depois mai to'o parlamentu para halo nusa polísia, deputadu no governante sira, instituisaun sira hotu no sosiedade sivíl, komunidade inklui ema se de'it atu bele foti to’ok asaun ruma”, dehan nia ba www.tempotimor.com liuhusi telefone sábadu (05/06).

Kazu ne’ebé akontese, tuir informasaun katak antes ne'e iha problema privadu entre Membru Polísia ne'e ho vítima sira iha ona prosesu justisa.

Membru Polísia ne'e hela iha aldeia Gomes Araujo, hafoin iha madrugada tuku 2:15 mak nia ho pistola ba vítima sira-nia uma iha aldeia Ainitas.

"Entaun iha momentu señor (M) husi ninia uma mak mai iha ami-nia aldeia Ainitas Hun, ita bele hatete katak ne'e hanesan asaltu ida”, deklara nia.

Tanba iha madrugada ema hothotu toba iha nia uma, maibé membru polísia ne'e mai halo maneira ida ne'e, nia mai lori pistola tiru vítima na’in-tolu.

Iha mós informasaun katak membru polísia ne'e uza pistola hodi ba ameasa atu tiru tan Xefe Aldeia Hospital Militar.

"Nia fila tutuir dalan sei tiru nafatin, ate tuir informasaun ne’ebé mak ami hetan tutan katak, nia ba fali iha aldeia Hospital Militar nia mós uza pistola ne'ebé nia kaer hodi ameasa ba xefe aldeia Hospitál Militar nia ulun, hodi ameasa dehan o mangame ha’u tiru tan”, hatete nia.

Entretantu, trajédia ne’e akontese iha aldeia Ainitas Hun, suku Lahane Osidentál, Postu Administrativu Vera-Cruz, Munisípiu Dili. Ne’ebé rezulta oan mane ho naran Camilo de Deus no aman Filomeno de Deus lakon vida inklui joven ida seluk ne’ebé kontinua halo tratamentu saúde iha Ospitál Nasionál Guidu Valadares (ONGV).(*)