“Ha’u hakfodak no triste rona elementu PNTL ida ohin (05/06) madrugada hodi arma Estadu nian tiru mate ita-nia sidadaun na’in-rua no ida kanek todan iha Lahane Osidental, Ha’u la menta e kondena tebes aktu refere”,dehan Taur liuhosi komunikadu impresnsa ne'ebé www.tempotimor.com asesu, sábadu (05/06).
“Ita hotu la tolera ida ne'e, e hanesan Primeiru-Ministru no Ministru Interior, ha'u orienta ba Komandu PNTL para dezarma elementu ne’e, hatama ba sela hodi halo prosesu investigasaun", nia orienta
Iha biban ida ne’e, PM Taur lori Governu nia naran hato’o profunda sentida kondolénsia ba familia matebian nian, no husu deskulpa boot ba família vítima sira ba hahalok ne’ebé envolve hosi elementu PNTL.
Governu sei hola medida ne'ebé forte hasoru elementu Polísia ne’e hodi bele responsabiliza ba aktu ne'ebé nia halo ona, no Governu sei kontinua akompaña prosesu hotu nomós sei apoiu família matebian nian hodi hetan justisa ba akontesimetu ne’e. (*)