Konfrontu ne’ebé mosu iha loron 11 fulan-maiu tinan 2021, maizumenus tuku 23:17, husi joventude sira iha Postu Administrativu Laleia, Munisípiu Manatutu, hodi rezulta ajente PNTL ida hetan kanek gráve.

Ajente PNTL ne’ebé hetan kanek bainhira ba hala'o atuasaun iha terrenu mak hetan tuda husi joven sira iha Laleia.

"Asaltu malu entre grupu, iha dia 11 de Maiu 2021, iha postu administrativu Laleia ne'ebé rezulta membru PNTL ida hetan kanek, tuda husi sidadaun sira. Oras ne'e dadauk prosesu ne'e la'o hela, e komandu Munisípiu Manatutu sei buka hela suspeitu sira ne'e, atu nune'e bele lori mai iha Manatutu, para hodi halo prosesu investigasaun”, informa Portavóz Komandu jerál PNTL, Superintendente Polisia, Arnaldo de Araújo, liuhusi konferénsia imprénsa iha Kaikoli, tersa (01/06).

Aleinde ne'e, insidente hanesan mós akontese iha Munisípiu Ermera, tanba mosu asaltu malu entre grupu Kolimau ho grupu Sete-sete (77), ne'ebé rezulta estragu no kanek.

"Suspeitu aprezenta-an ona mai iha komandu Munisípiu Ermera, no oras ne'e dadauk sei halo hela identifikasaun ba asuntu ida ne'e”, dehan nia.

Kauza husi baku malu ne'e, tanba de'it dezentendimentu ba malu, maibé situasaun iha Ermera di'ak no kontroladu hanesan mós iha Manatutu. (*)