Lere: PSHT, IKS, KORK “Restu” husi Kolonialista Laiha Moral Featured

Komandante F-FDTL, Major Jeneral Lere Anan Timur iha Palasiu Prezidencial Komandante F-FDTL, Major Jeneral Lere Anan Timur iha Palasiu Prezidencial Foto Midia PR

Tempotimor (Dili) - Xefe Estadu Maior FALINTIL Forsa Defeza Timor Leste (F-FDTL) Maijor Jeneral Lere Anan Timur hasai deklarasaun maka’as ba grupu artemarsiais Persaudaraan Setia Hati Terate (PSHT), Ikatan Kera Sakti (IKS) no Klibur Oan Rai Klaran (KORK) ne’ebé kontinua kria instabilidade.

Tuir Lere grupu artemarsiais tolu ne’e la’os Timor nian, maibé nu’udar ‘restu’ husi Indonezia ne’ebé okupa Timor Leste durante tinan 24 nia laran.

“Artemarsiais ne’ebé agora ita temi daudauk hanesan PSHT, KORK, Kera Sakti ne’e mai husi Indonezia hotu, la’os Timor ninian. Ha’u moris iha tempu koloniál ninian, ha’u haree de’it mak Kung Fu iha Akadiruhun ne’ebá,” dehan Lere hafoin hasoru-malu ho Prezidente Repúblika iha Palasiu Prezidensial Bairro-pite, Tersa (09/07).

Komandante F-FDTL ne’e dehan, grupu artemarsiais tolu ne’e eziste kedan dezde okupasaun Indonezia. Tanba ne’e governu Timor Leste tenke haree hodi fó medida, tanba artemarsiais hirak ne’e mak fatór instabilidade.

“Hanesan foin lalais iha Leorema na’in rua mate, na’in tolu kanek, sunu uma sanolu resin tolu,” dehan Lere.

Tuir Lere, krime ne’ebé akontese iha Leorema nu’udar krime organizadu, la’os krime entre grupu artemarsiais tanba governu to’o ohin loron seidauk legaliza grupu artemarsiais hirak ne’e.

“Ha’u la admite (krime organizadu), tanba uluk kedas funu ne’e hotu ona, sona-malu hotu ona. Agora ita oho-malu ne’e immoral,” dehan nia.

Kona-ba reativa grupu artemarsiais ne’ebé governu bandu, Lere dehan, laiha dalan atu reativa, tanba grupu ne’e rasik seidauk hetan rekoñesimentu husi governu Timor Leste.

“Ha’u nunka temi reativa, tanba Timor Leste nunka iha (grupu) artemarsiais ne’ebé rekoñese husi lei, no (ikus mai) taka. Kuandu lei rekoñese depois taka, (atu loke fali) ita bolu reativa fila fali, signifika halo moris fila fali, mais nunka iha,” dehan Lere.

Rate this item
(27 votes)
Last modified on Thursday, 11 July 2019 14:56
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com