Maibe, Fundasaun Mahein (FM) husu ba komandu PNTL atu halo investigasaun ba membru sira no prosesa tuir lei dixiplinár instituisaun nian.
"Ita labele haree ba asaun, atuasaun ne'ebé mak polísia atu halo iha ne'ebá, maibé ita mós presiza haree ba nia kauza saida mak mosu iha akontesimentu ida ne'e”, hatete Komandante Operasaun Nasionál, Superintendente Xefe Pedro Belo, liuhusi konferénsia imprénsa iha Kaikoli, segunda (24/05).
Kauza loloos ne'ebé mosu uluk iha insidente ne'e, ema hotu la ko’alia, la hatete, maibé atuasaun ikus ne'ebé mak polísia halo, sai fali kestaun ba públiku iha ema hotu nia matan.
"Maibé, hakarak hatete loloos katak, akontesimentu ne'ebé mak iha ne'ebá, ita hatene katak, kuandu iha momentu ita-nia polísia sira atu impõem regra ne'e, atu esplika lubuk ida ba ita-nia negosiante, maibé saida nia hasoru ba ita-nia polísia sira iha ne'ebá. Kuandu ita ko’alia mak ema hotu koñese ona mak nia kumpri, ha’u hanoin katak buat sira ne'e hanesan horseik ne'e la akontese, sei la akontese”, dehan nia.
Tui rezolusaun governu númeru 60/2021, autoriza negosiante ambulante sira bele halo movimentu ba-mai iha kapitál Dili laran hodi fa'an sasán.
"Maibé, sira ba fali liur, iha fali regra ida ne'ebé mak ema hotu tenke kumpri”, dehan nia.
Tanba ne’e, presiza hatene, pontu entrada ne'ebé mak tau iha Tasitolu atu estabelese regra ba ema sira ne'ebé mak tama sai husi Munisípiu mai Dili no sai ba Munisípiu sira.
"Iha ne'ebá, iha regra ne'e mak atu halao, loke ba ema sira negosiante sira, atu halo ninia atividade ne'e iha segunda, kuarta sesta. Iha situasaun ida ne'e kontráriu ho horseik, ita hotu hatene katak, horseik ne'e domingu, mais tanba saida mak atividade iha ne'ebá ne'e bele la'o”, afirma nia.
Iha sikun seluk, Diretór Ezekutivu Fundasaun Mahein (FM), João Almeida, husu ba komandu PNTL atu halo investigasaun ba membru sira ne'e, no prosesa tuir lei dixiplinár instituisaun nian.
"Asaun ida ne'e, fundasaun mahein kondena tebtebes, e husu komandu jerál loke investigasaun ba elementu ne'e. Purtantu, ita haree ba regra ou prosedimentu sira ne'ebé aplika ba instituisaun PNTL, bainhira elementu ida kométe sira hanesan ne’e, loke prosesu rua, ida mak prosesu dixiplinár, ida seluk mak kriminál”, hatete nia.
Tuir kronolójia, insidente oknum PNTL nain-rua ne'e ne'ebé baku lisuk negosian nu'u, Octário Thal (OT) ne'e, mosu iha loron domingu (23/05), maizumenus tuku 11:00 loron, iha pontu entrada Tasitolu.(*)
