"Ohin ami halo diskusaun kona-ba apoiu estratejia balu área parseria nian liliu kona-ba atu mellora redusaun risku dezastre, jestaun risku dezastre naturál no sistema alerta sedu no oinsá mak ami bele apoiu Ministériu Interior liuhusi Sekretariu Estadu Protesaun Sivíl atu iha mekanizmu ida ne’ebé di'ak hodi halo preparasaun kona-ba jestaun atu hasa’e rezilénsia komunidade hasoru no prevene dezastre naturál sira iha tempu udan”, informa Xefe UNDP, Munkhtuya Altangerel, liuhusi karta komunikadu ne'ebé www.tempotimor.com asesu, sesta (21/05).

Reprezentante misaun UNDP iha TL ne'e hatutan, importante duni atu halo diskusaun ho instituisaun relevante sira seluk hodi halo preparasaun ne’ebé sustentável atubele solusiona área hirak ne’ebé presiza duni apoiu hodi nune’é sei lori transformasaun ba ministériu ne'e.

Nune’e Ministru Interior (MI), António Armindo hato'o agradese ba komitmentu husi apoiu sira ne'ebé UNDP iha, tanba hakarak servisu hamutuk liután ho governu TL.

"Rekuñese presiza tebes atu mellora kooperasaun institusional ho parseria dezenvolvimentu sira, e ita agradese ba tulun ne’ebé durante ne’e hetan husi UNDP no husu atu sira kontinua apoiu Ministériu Interior iha futuru”, afirma nia. (*)