Iha loron 21 fulan-maiu tinan 2021, komisaun deklara, lista kandidatu ne'ebé liu iha selesaun dokumentu ba tinan ne'e hamutuk 3,139 pesoál, husi totál formuláriu 12,259 ne’ebé komisaun rekolla iha inisiu 2020.
“Maibé, depois de komisaun halo reverifikasaun ba kandidatu 3,139 ne’ebé temi iha leten, konsege hetan númeru final hamutuk 2,400 kandidatu”, hatete Nuno iha salaun Kuartel Jerál F-FDTL Fatuhada, sesta (21/05).
Maibé, totál husi 2.400 ne'ebé mak liu ona selesaun sei iha ezaminasau hodi ne'e sei ta'es mak foin hakat ba treinu.
"Husi 2,400 kandidatu ne'e, sira sei tama ba fase ezaminasaun médika, teste fízika, psicotéknika, no intervista”, esplika nia.
Iha faze hirak ne'e, komisaun sei ta'es filafali kandidatu sira nia rezultadu ezame no halo reverificasaun tan, antes fó sai naran final ba publiku iha fulan-jullu, no sira sei inkorpora ba instituisaun iha inisiu fulan-agostu tinan 2021 hahú treinu.
Lista ba sidadaun ne'ebé mak konkore ba F-FDTL ne'e sei taka sai husi kapitál Dili to'o Postu Administrativu no publika sai husi mídia televizaun, radiu no online. (*)
