Asaun oknum PNTL ne’ebé hakanek joven sira, mak família ezije atu prosesu tuir dalan justisa ho lolos, tanba konsidera violensia.
Vítima sira ne’ebé hetan kanek hanesan, Domingos Valdo dos Santos (20) kanek iha kabás karuk, Pauleta de Jesus Carlos (17) iha kelen parte karuk, no Ricardo Abrăo da Costa António (18) kanek iha ulun, dadaun ne’e baixa hela iha Hospital Nacional Guido Valadares.
Tanba ne’e, Vítima Domingos Valdo dos Santos (20), konta tuir, iha lorokraik maizumenus tuku lima liu, mosu konfrontu asalta malu entre joventude bairu Mascarenhas ho Kailoli.
Durante konfrontu, joven sira husi bairru Mascarenhas organiza malu ho sasán kroat hasoru joven sira iha Kaikoli, maibé to'o iha postu polísia Mascarenhas nia oin, oknum ne'ebé halo hela seguransa, koko atu hakalma situasaun no tiru.
"Ami hasoru sira tun mai ho armas brankas, kaer kolega atu hodi sae ba leten, entaun ami hasoru sira, polísia mós la tiru sira, ami ida liman mamuk atu hadau kolega ida sira rasta sae ba ne'e, tiru fali ami. Ne'e mak kolega ne'e monu tun tiha, konsege ami uza fatuk hasoru sira hodi hadau fali kolega mai, ne'e mak konsege hetan tiru tan”, haktuir Domingos iha nia rezidénsia Kaikoli, segunda (02/05).
Akontesimentu ne'e mosu, bainhira nia koko atu salva hela nia kolega ida, ikus mai hetan tiru husi nia kotuk hodi rezulta kanek iha kabás karuk.
Olga de Jesus, inan husi vítima Pauleta de Jesus Carlos (17), nu'udár sasin ba insidente ne'e haktuir, oknum ne'e se direta pistola hodi tiru hasoru nia oan sira ho distánsia kuaze metru lima de'it.
Ho insidente ne'e, parte família ezíje justisa ba komandu PNTL atu prosesa nia membru tuir lei..
"Ida ne'e violasaun ida ba direitu ema nian, tanba nia (oknum) mai tiru loos ami-nia de'it. Ida ne'e hanesan inan ami la konkorda, tenke halo investigasaun ba nia duni. Ami hakarak husu justisa loos de'it, tanba horkalan ami ba polisia, mais haruka ami fila, imi iha ne'ebá ne'e, ema la book ona", hateten nia.
Entretantu, komandante jerál PNTL, Komisáriu Faustino da Costa hatete, dadaun ne'e ekipa Servisu Investigasaun Kriminal (SIK) prosesa hela oknum polísia, bainhira remata sei anúnsia rezultadu ba públiku.
"Liga ho akontesimentu Maskareñas, oras ne'e ekipa investiga hela e tempu sira tuir mai nian sei hato'o husi portavóz komandu PNTL nian", informa Faustino iha Kaikoli. (*)
