Tempotimor (Dili)-Kompaña Timor Holding entrega Postu Polisia Tranzitu foun ba Komandu Polísia Nasional Timor-Leste PNTL Munisípiu Díli atubele asegura situasaun iha área Bairro pite.

Reprezentante Komandu jerál PNTL, Superintendente Xefe, José Soares hatete, postu polísia tránzitu ne'e hetan reabilita husi kompaña Timor Holding ho Voluntáriu.

"Ohin kompañia refere entrega mai iha PNTL, atu nune'e bele utiliza halo kontrolu iha sirkulasaun viatura motorizadas, kontrola seguransa iha suku Bairro pite”, dehan Xefe Administrasaun jerál komandu PNTL ne'e hafoin inaugura postu seguransa, iha Suku Bairopite, kuarta (21/04).

Tanba ne’e, lori komandu PNTL nia naran, hato'o agradese profunda ba kompañia ne'ebé Vvluntáriu reabilita postu ne'e hodi fasilita membru sira hala'o seguransa.

Segundu Komandante PNTL Munisípiu Dili, Superintendente Polisia, Euclides da Costa Belo dehan, postu seguransa ba tránzitu liuliu ba Munisípiu Dili, bainhira tempu udan hetan difikuldade hodi halo atendimentu.

“Kompaña Timor Holding ne'ebé voluntariamente ajuda hadi'a postu ho di’ak, ita sei utiliza máximu para fó atendimentu ida di’ak ba ita-nia komunidade sira”, dehan nia.

Vise Diretór Kompañia Timor Holding, Joe Ribeiro esplika, planu hari'i postu ne'e, inisia husi komandu jerál PNTL, maibé tanba laiha kondisaun, nune'e sira husu ba kompañia atu halo reabilitasaun.

"Sira hatama dokumentu husu apoiu oituan, prontu ami mós fó apoiu oituan ita haree took ba ajuda malu, ita lori took dezenvolvimentu ne'e ba oin. Ida ne’e mak ami empreza Timor Holding nia kontribuisaun”, dehan nia.

Kona-ba valór orsamentu ne'ebé kompaña uza hodi reabilita postu ne'e, nia lakohi temi, maibé nia dehan, orsamentu ladun boot, tanba Timor Holding dala-barak ona fó ajuda no lakohi ema atu hatene kona-ba sira-nia kontribuisaun.

Postu ne'e rasik iha salaun boot rua, sala dormitóriu rua, hari'is fatin ida, inklui mós dapur ida, no kompleta mós ho kadeira, meza, Air Condicioner (AC).(*)