Portavóz komandu jerál PNTL, Superintendente Polísia Arnaldo de Araújo informa, granada ne'ebé komunidade sira hetan, ho kondisaun sei di'ak, no asegura kedan husi komandu polísia Munisípiu Manatutu.
"Ha'u hatete katak, buat ne'e sei di'ak, e granada ne'e sei bele ativu”, dehan Arnaldo liuhusi iha Komandu jerál PNTL Kaikoli, segunda (19/04).
Prosesu ba kronolojia hetan granada ne'e, komunidade sira mak hetan, no PNTL Manatutu kontinua hela investigasaun hodi hatene klean kona-ba material funu ne’ebé mosu iha konunidade nia uman leten.
"Atu dehan ema mak soe ka buat ne'e mai husi ne'ebé, PNTL sei investiga, sei buka hela. Sei rekolla informasaun, dadus balu hodi bele hatene katak, buat ne'e mai husi ne'ebé, tanba sá mak iha ne'ebá, ida ne'e polísia sei buka tuir hela”, afirma Arnaldo.
Dadaun ne’e komandu Munisípiu Manatutu hein hela ekipa EOD husi Dili atu ba halo destroisaun ba granada refere.
Tuir relatóriu semanal husi komandu jerál PNTL katak, hahú loron 09 to'o 19 fulan-abril ne'e, insidente hamutuk 27, kompostu husi asaltu malu-11, violénsia domestika 13, ema mate tanba eletrisidade soke na'in rua, hetan granada ida no inklui asidente tráfiku hamutuk 10.(*)