Deklarasaun ne’e Tenente Jeneral hato’o ba joven sira ne’ebé konsentra hela besik iha sala Izolamentu Vera Cruz, bainhira hasosru malu ho líder istoriku Kay Rala Xanana iha Vera Cruz, tersa (13/04).

Lere dehan, joven sira ne’ebé konsentra iha besik sala izolamentu oin laiha nesesidade tenke fila, tanba ema ne’ebé konsentra iha fatin ne'ebe so iha nesesidade.

“Joven sira ne’e mós hanesan. Ema mai iha nesesidade mak iha ne’e, la’ós mai halo saida?. Balun mai iha ne’e dehan ami hamutuk ho maun (Bo'ot). Ami ne’e hamutuk uluk kedan, iha situasaun difísil, la’ós iha situasaun di’ak mak ami hamutuk ho maun (Bo'ot)”, dehan Lere ba joven sira ne’ebé konsentra iha Izolamentu Vera Cruz.

Maibé, Lere husu ba joven sira atu komprende, tanba líder sira ne’e mai hotu husi ai-laran.

“Sira husi aí-laran mak halo buat nee imi joven sira mak tenke komprende, Imi komprende”, nia hateten.

Tanba ne’e, joven sira presiza fó hatene malu hodi husik estrada no fatin hothotu.

“Ne’e mak joven sira imi orsida hatete ba malu. Ha’u lakohi ema ida konsentra iha ne’e. Husik katuas (Bo'ot), família matebian mak iha ne’e ho polísia”, dehan Lere.

Bainhira joven sira kontinua konsentra iha estrada no besik izolamentu oin, sei haruka polísia dudu fila, tanba laiha nesesidade atu joven sira konsentra.

Husu mós ba joven sira atu labele halo Polisia Nasional Timor-Leste ulun moras, tanba autoridade seguransa mós iha família no problema uma laran atu haree.

“Orsida joven sira mai hatete ba sira jeneral dehan ita labele konsentra iha ne’e. Konsentra iha ne’e sei mai dudu ita. Mak ne'e de’it, estrada ema labele mai konsentra. Tanto iha ne’e, tanto iha ne’ebé de’it. ne’ebé ida-ida ba halo nia servisu”, afirma Lere.

Nia dehan, problema ne’ebé mosu la’os problema partidu ka grupu nian, maibé problema nasaun nian.

“Imi joven sira iha ne’e balun partidu ninian. Ida ne’e la’os problema partidu ninian. Ida ne’e problema nasaun, problema estadu”, Lere dehan.

Ho ida ne’e, joven sira tenke husik fatin no labele konsentra atu nune’e líder sira bele ko’alia ba malu.

“Husik katuas sira mak ko’alia ba malu, Taur mak Primeiru Ministru, Lú Olo mak Prezidente, nia (Xanana) mak ami nia maun. Husik sira mak ko’alia ba malu”, dehan nia. (*)