Deklarasaun ne'e, Faustino hato'o, bainhira tun observa direta situasaun iha pontu entrada Tasitolu mai kapitál Dili ne'ebé iha populasaun barak durante hela iha Dili, maibé hakarak fila ona ba kada munisípiu no sira husi munisípiu hakarak fila mai kapitál nasaun laran.
Ulun-boot instituisaun PNTL ne'e dehan, ninia prezensa iha postu seguransa Tasitolu, atubele hato'o ba nia membru polísia sira hotu hodi esplika ba komunidade sira, ho meius halo nusá atu populasaun sira bele fila.
"Kuandu sira ne'ebé iha karta autorizasaun husi sala situasaun ou parte relevante ne'ebé iha autoriza atu halo dezlokasaun, ida ne'e mak sei nafatin hala'o hanesan baibain, maibé, ida ne'ebé laiha autorizasaun husi sala situasaun, sira ne'e ida-idak tenke fila ba ninia fatin”, hatete Faustino iha postu seguransa Tasitolu, sesta (02/04).
Hanesan públiku akompaña katak dadaun ne'e governu halo hela estensaun ba Konfinamentu Obrigatóriu (KO) no Serka Sanitária (SS) iha kapitál Dili, aumenta ba semana rua ka loron 14 tan.
Tanba ne'e dehan, la signifika konfinamentu obrigatóriu ho serka sanitária atu remata ona iha loron 02 fulan-abríl tinan ne'e, maibé, sei kontinua tan ba loron 14.
"Ho interpretasaun hanesan ohin ha'u dehan, ne'e mak implika, la'os de'it iha parte postu fronteira ida ne'e mai, maibé kuaje husi postu fronteira sira hotu, iha Dili laran ne'ebé sai ba Munisípiu, nomós fatin sira ne'ebé entrada prinisipais sira ne'e, ita-nia komunidade, populasaun sira ne'e nakonu loos ke tenta hakarak sai, sira hanoin dehan dia 02 ne'e, kuandu dia 01 tama ona dia 02 ne'e hotu ona, maibé la'os interpretasaun hanesan ne'e, ida ne'e mak komplika”, dehan nia.
Tanba ne'e, nia nafatin husu ba komunidade sira atu idaidak fila ba nia fatin no labele viájen sai ba Munisípiu nune'e mos husi Munisípiu sira labele hakat mai kapitál nasaun, bainhira la aprezenta dokumentu komprovativu ruma husi parte relevante sira.
"Ita-boot sira akompaña, ita ho maneira esplika ba sira para halo nusá, ita tenke haruka sira fila, liliu ba sira ne'ebé laiha autorizasaun. Klaru ke ita sei nafatin halo nusá para tenke fila”, nia hakotu.
Maibé tuir, observasaun www.tempotimor.com iha postu seguransa polísia iha pontu entrada husi Munisípiu Kovalima, Ainaro, Manufahi no Ailleu nian, nota katak, iha populasaun barak mak hakarak sai ona ba sira-nia munisípiu, maibé membru polísia sira la autoriza, tanba seidauk Serka Sanitaria nune'e bainhira populasaun la aprezenta karta ofisial ruma husi parte relevante, PNTL sira haruka fila ba sira nia hela fatin.(*)
