Mario Soares, nu'udár sidadaun ida husi munisipiu Ermera, Postu Administrativu Railaku dehan, hakarak fila ona ba nia munisipiu, maibé to'o iha Tasitolu, membru polísia sira ne'ebé halo hela seguransa, la loke dalan no haruka sira tenke fila.
Nia dehan, razaun nia ho família hakarak fila ona ba foho, loas tanba moras surtu Covid19, maibé tanba nesesidade atu uza moris kada loron nian durante tempu serka sanitária iha Dili mak laiha ona.
"Ha'u ho oan no ferik-oan, ami atu fila ba Railaku, mais dalan ema taka ba ne'e. Ami ba la'os dehan covid lae, ami ba ne'e tanba hahan laiha ona. Ami servisu iha kompañia mós agora para hotu, entaun ami osan laiha ona", dehan Mario hafoin PNTL haruka sira fila iha pontu entrada Tasitolu Dili, sexta (02/04/2021).
Tuir observasaun www.tempitimor.com iha terrenu nota katak, laos de'it populasaun husi Dili mak atu fila ba munisipiu, maibé sira husi munisipiu Bobonaru, Ermera no Likisa mós hakarak fila hotu mai Dili, maibé PNTL haruka sira tenke fila, tanba seidauk iha desizaun formal ruma governu.
Alende ne'e, hahú husi oras dadeesan to'o tuku 9 liu ne'e, populasaun kuaze rihun resin iha Dili mak polisia haruka fila ona, maibé komunidade sira husi munisipiu tolu seluk iha ona pontu entrada ezije tama mai kapital Dili, sei hamri'ik forma no hein hela iha pontu entrada Tasitolu.
Maske nune'e, polísia mós autoriza dadaun sidadaun balu husi munisipiu tolu tama mai kapitál nasaun, tanba hetan ona karta autorizasaun husi Sentru Integradu Jestaun Kríze (SIJK) husi munisipiu.(*)