Print this page

Solidariedade Susar ho nia grupu ba Xanana, PNTL laiha Kuñesimentu

Portavóz PNTL, Superintendente Polísia, Arnaldo de Araújo koalia hela ba média sira iha Komjer Kaikoli, kinta (01/04/2021). Portavóz PNTL, Superintendente Polísia, Arnaldo de Araújo koalia hela ba média sira iha Komjer Kaikoli, kinta (01/04/2021). Foto Tempo Timor

Tempotimor (Díli)- Iha loron 29 fulan Marsu tinan 2021, mais ou menus iha tuku 08:20, mosu grupu ida ho naran Klibur Tane Aas Obra Maun Xanana (KTAOMX), ne'ebé lídera husi Amaro da Costa "Susar" ho nia membru sira akompaña líder nasionál Kay Rala Xanana Gusmão ba iha Ministériu Públiku (MP), maibé asaun solidariedade husi grupu ne'e, Polísia Nasionál Timor-Leste (PNTL) rasik laiha kuñesimentu.

Porta-vóz Komandu Jerál (Komjer) PNTL, Superintendente Xefe Arnaldo de Araújo akresenta prezensa grupu KTAOMX iha MP nia oin ne'e, nu'udár simpatizantes ka apoiantes, hodi apoia no fó solidariedade ba Xanana.

"Iha momentu ida ne'e, asaun ne'e laiha kuñesimentu, ne'e hanesan ema simpatia no espontanea de'it, mais simpatia ba ita nia maun boot Xanana", dehan Porta-vóz Arnaldo, liuhusi konferénsia imprensa, iha Komjer Caicoli, kinta (01/04).

Nia hatutan, aleinde PNTL laiha kuñesimentu, maibé grupu KTAOMX nee rasik mós la kumpri ka dezobediénsia ba regra estadu emerjénsia no konfinamentu obrigatóriu ne'ebé fó sai husi Ministériu Saúde (MS) ho Organizasaun Mundiál de Saúde (OMS).

"Entaun iha ne'e, iha artigu 422 hakerek ona iha ne'ebá, dehan katak ne'e dezobediénsia no PNTL notifika ona ema balun, halo ona prosesu investigasaun ba sira. Ita hatene katak maun boot Xanana ne'e respeita tebes regras ida ne'e. Ne'e maka haruka polísia hodi duni ema sira ne'e", dehan Arnaldo.

Kona-bá notifikasaun ne'ebé SIK rekolla ona husi Susar, atu lori ba MP ka lae, nia dehan, depende ba prosesu no rezultadu investigasaun husi investigadór sira mak foin bele hatene, atu avansa ka lae.(*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items