Rekomendasaun FM nia mak sensebiliza komunidade sira kumpri ba regra sira prevensaun Covid-19, nu’udar kna’ar prinsipal ida husi membru PNTL sira iha terenu durante implmentasaun Estadu Emerjénsia, la admite uza forsa ne’ebé la nesesariu.

“Iha ne’ebé determina ona iha medida sira ezekusaun ba EE nian nu’udar dezeobedensia ba Lei no nia medida sira hala’o tuir Kódigu Prosesu Penal no Kódigu Penal Timor-Leste nian. Nune’e mos uza forsa kaer metin ba Rejime Juridiku Uzu Forsa nian”, dehan João liuhusi komunikadu imprensa, kuarta (31/03).

Iha ámbitu koordenasaun no komunikasaun iha nivel komandu PNTL nian presiza hadi’a ligadu ho implementasaun Lei no regra sira EE.

Tanba, ida ne’e hodi evita naksalak ka interpretasaun sala husi membru sira iha terenu. Nune’e mós enkoraja membru PNTL sira iha terenu promove komunikasaun di’ak ho komunidade sira (dialogu) duke aproximasaun sira ne’ebé ho de’it forsa.

Aleinde misaun espesifiku sira resposta ba pandemia Covid-19, PNTL mós kontinua mantein misaun no kompeténsia sira ne’ebé atribui ba PNTL tuir Lei Organika PNTL nian.

Nia dehan, iha ne’ebé estratéjia no aproximasaun sira kontinua kaer metin ba filozofia PNTL nian, polísia komunitária, ho doutrina VIP (vizibilidade, involvimentu no profesionalizmu) iha asaun sira polisial nian iha ámbitu manutensaun, ordem no trankuilidade públika.

“Presiza polítika seguransa ida ne’ebé ligadu ho tarefa sira PNTL nian ne’ebé la’ós de’it haree ba funsaun sira polisial nian”, afirma nia.

Maibé mós realidade foun seluk hanesan ameasa ba saúde públika (Covid-19), presiza most ajusta ho tarefas sira PNTL nian.

Portantu situasaun atual PNTL nian, sei falta polítika ida ne’ebé bele orienta ninia dezenvolvimentu, iha tempu hanesan menus ba infraestrutura, lojistika no rekursu umanu.(*)