Tempotimor (Dili) - Komandu Polísia Nasional Timor-Leste (PNTL) Munisípiu Dili foti medidia hodi "obriga" simpatizante Kay Rala Xanana Gusmão ne'ebé halibur malu husi Jardin Kolmera to’o área Mandarin Dili hodi fó ultimatu minutu 10 hodi husik hela Jardin Bebora, tanba kontra regra Serka Sanitária (SS) no konfinamentu domisiliáriu obrigatóriu.
Liuhusi mikrofone, Segundu Komandante PNTL Munisípiu Dili, Superintendente Asistensia Euclides Belo, aviza ba grupu ne'ebé hatais faru Xanana Gusmão hanaran Saladeus inklui komunidade no funsionáriu husi Ministériu Turismu Komérsiu no Indústria atu fahe malu no ba ida-ida nia nia fatin.
"Maluk sira ne'ebé iha karaik ne'ebá, kuandu laiha nesesidade fila ba uma, minutu sanulu nia-laran, kuandu liu ida ne'e ha’u bolu trek mai tula ita-boot sira”, dehan Euclides iha Bebora Dili, segunda (29/03).
Euclides hatete, grupu simpatizante, komunidade sira ne'ebé halibur malu bainhira lahalo tuir avizu ne'ebé hato'o, PNTL sei foti medidas tuir lei.
Entertantu tuir observasaun www.tempotimor.com iha terrnu nota, dader iha jardin Kolmera grupu ne'ebé hanaran Saladeus hatais faru líder Xanana halibur malu hodi hein prezensa to’o Xanana sai husi MP tuku 09:40 otl.
Hafoin iha Jardim Kolmera, grupu Saladeus kontinua mobiliza malu la’o ain to’o edifisiu GMN hodi halibur malu iha área jandin Bebora to’o envolve mós funsionariu balun husi MTKI no komunidade iha área Mandarin.
Nune'e, PNTL rasik konsege atua hodi haruka fila grupu hanutuk ho komunidade sira fahe malu..
Prezidenti CNRT, Xanana Gusmão nia prezensa iha Ministériu Públiku (MP) hodi reprezenta kuadru inportante husi CPN-CNRT relasiona ho keixa Sekretáriu Jerál Fretilin Mari Alkatiri kona-ba akuzasaun subornu.
Entertantu, bazeia ba deklarasaun Estadu Emerjénsia (EE) no dekretu Prezidente Repúblika (PR) númeru 15/2021 data 1 marsu no dekretu governu númeru 6/2021 data 02 Marsu kona-bá medida ezekusaun ba deklarasaun EE nian relasiona ho Pandemia covid-19 bandu ema atu halibur malu no manifesta iha fatin públiku.(*)
