Kazu torturasaun hasoru lezada na’in-rua AC ho AD iha área marínir, Aldeia Beto Tasi, Suku Madohi akontese, tanba iha relasaun ho kazu ne'ebé molok ne'e mosu uluk iha área Ai-tarak Laran nian ne'ebé rezulta komunidade balu nia uma no sasán hetan estragu.

Hafoin insidente ne'e mosu, vítima sira hato'o ona keixa ba polísia, maibé la halo atuasaun imediata, ikus mai mosu fali kazu seluk ne'ebé espalla iha públiku, ida ne'ebé ema hotu la aseita ho hahalok ida ne'e rasik.

"Maibé iha kazu ida ne'e rasik, hakarak hatete, sé bainhira polísia nia intervensaun lalais, ha'u hanoin katak torturasaun sira hanesan ne'e, la akontese, tanba prezensa polísia nian tarde, liuliu medida sira preventiva atu prevene krime ou violénsia ne'e daet tutan ba ema seluk no boot”, hatete Joăo iha nia kna'ar-fatin, Bairro dos Grilhos, sesta (26/03).

Tuir loloos kazu estraga ema nia uma ho sasán iha Ai-tarak Laran ne’ebé mosu antes, polísia tenke halo kedan intervensaun bainhira vítima sira hato'o keixa, liuliu halo identifikasaun ba suspeitu sira ne'ebé envolve iha kazu ne'e rasik, maibé tanba ho polísia ninia tarde ka la resposta ne'e rasik, ikus mai komunidade sira mak halo julgamentu rasik.

"Purtantu, ida ne'e bele hatudu insatisfasaun komunidade nian, ba servisu polisial ninian, iha ne'ebé sira halo ona keixa, sira sente vitíma ona ba kazu ne'e rasik, maibé polísia la halo intervensaun liu-iu halo identifikasaun. Ida ne'e hanesan medida preventiva ida ne'ebé loloos Polísia halo, maibé la halo, ikus mai mosu ida ne'e”, dehan nia.

Maske nune'e, akontese ida ne'e mosu loos iha situasaun ida pandemia nia laran, ida ne'e, nia hanoin katak dilema mós ba polísia iha tempu ne'ebé menus ba rekursu.

"Purtantu, servisu ida dupla, alende halo servisu ida polisial ninian, responde ba kazu sira hanesan temi liuba dadauk ne'e, maibé iha tempu hanesan, polisia mós halo servisu seluk ne'ebé tulun estadu, tulun ita nia komunidade, liuliu aplika ka sosializa regra sira kona-ba medida prevensaun ba virus corona ninian”, haktenik nia.

Situasaun sira hanesan ne'e, ezíje polísia tenke servisu extra duni, tanba kazu ne'ebé mosu violénsia, konfrontu ka asaltu malu entre grupu, kazu rama ambong, no iha tempu hanesan sira mós hala'o kna'ar importante ida liuliu ligadu ho prevensaun Covid-19 ninian.

"Iha ne'ebé ita haree iha estrada, iha bairru, iha suku no aldeia, polísia tenke la'o to'o iha ne'ebá hato'o ba ita-nia komunidade sira kuidadu ho prevensaun Covid-19 ne'e. Tanba ne'e, misaun importante ida ba PNTL atubee haree oinsá identifika área sira ne'ebé iha risku, alende halo servisu ba Covid-19 ninian, maibé servisu sira polisial ligadu ho prevensaun krime ninian”, hatete nia.

Maibé, rekomenda mós ba PNTL atu halo intervensaun lalais kuandu iha ona keixa, ka iha ona relatóriu ruma ba polísia atu halo intervensaun, imediatamente atu nune’e bele prevene violénsia sira ne'ebé sai boot.

"Tanba kazu hanesan foin dadauk akontese, tanba resposta ne'ebé tarde ikus mai, komunidade sira halo julgamentu rasik e sira rasik solusiona ho dalan violénsia. Loloos, polísia tenke hola medida polisial atubele solusiona ho dalan ida lei ninian atu nune'e bele iha justisa. Sé bainhira atende tarde, iha ne'ebá bele mosu insatisfasaun. Entaun komunidade sira bele solusiona rasik ho violénsia”, afirma nia.(*)