Tanba ne'e, Polísia Nasionál Timor-Leste (PNTL), hala'o ninia servisu hodi bandu ema sira ne'ebé hala'o atividade la'ós emerjensia ka impórtante.

Komadante Jerál PNTL, komisariu Faustino da Costa hatete, bazeia ba medida serka sánitaria no konfinamentu obrigatóriu la autóriza sidadaun sira uza ninia direitu atu hala'o atividade ezersisiu iha fatin públiku, só autóriza mak hala'o ezersisiu iha ida-idak nia uma, kama leten, no kama laran.

"Buat ida halo ezersisiu ou olaraga ne'e, dehan tiha ona serka sánitaria ikus ne'e, hatete mómos, halo olaraga ne'e iha kamaleten, kama laran, uma laran, iha ne'ebá hatete, nusá mak gosta halai ba tasi ibun”, dehan nia iha Komandu Jerál PNTL kaikoli, kinta (25/03).

Bazeia ba regra serka sánitaria ne'e só autóriza mak ema sira ne'ebé hala'o movimentu ba sosa nesesidade urijente.

"Ema dehan, estádu emerjénsia bainhira o sai ne'e, bainhira o ba hola hahán, hola ai-moruk ba o nia família moras, o ba hola pulsa ahi nian, pulsa bee nian, pusla telefone nian, ida ne'e de'it, o sai ba halai iha tasi ibun ne'e, o nia direitu, o nia direitu ida ne'e suspende tiha ona, katak o nia direitu ne'e hala'o iha kama laran, kama leten”, afirma nia.

Ema sira ne'ebé kontinua viola regra serka sánitaria, parte seguransa sei atua nafatin ho sansaun ne'ebé iha, hanesan hatama ba sela detensaun.

"Ne'ebé, ida ne'e mak ami atua, dala ida tán katak, ami nia problema mak, sé Estádiu Munisípal ami mak utiliza karik, ema sira ne'e ami foti ba tau hotu iha ne'eba”, haktenik nia

Regra hotu preve ona iha rezolusaun governu nian ne'ebé propoin serka sánitaria no konfinamentu obrigatóriu iha Munisípiu Dili, nune'e labele viola.

"Ita ko'alia serka sánitaria, estadu emerjénsia, dala wa'in ema dehan, Polísia mak la halo servisu, mais atu dehan nune'e, iha estádu emerjénsia, serka sánitaria hatete mómos liuliu dekretu ne'ebé iha, estádu emerjénsia ne'e ema hotu nia direitu ba rezisténsia pasiva no ativa suspende hotu, polísia ba dehan o tau máskra, ami lakohi, entaun halo nusá, nia uza ninia direitu, nia laiha direitu, tanba ninia direitu suspende tiha, tenke koopera no akompaña”, esplika nia.

PNTL hakarak kaptura hotu ema sira ne'ebé viola regra serka sánitaria, maibé problema mak fatin sela detensaun la sufisiente.

"Ami hakarak kaer hotu ema sira ne'e sulan dala ida tán, hakarak sulan hotu, maibé problema mak ami-nia kapasidade, ami-nia laiha fatin merese, ne'ebé sé mak viola ne'e, ami sei halo nafatin prosesu ne'e la'o”, akresenta.

Maske, fatin sela detensaun la sufisiente, maibé PNTL kontinua esforsu hodi buka fatin hodi sulan ema sira viola regra prevensaun Covid-19.

"Ami tenta haree hela, seráke Estádiu ne'e fatin ne'ebé merese, para ema sira ne'ebé hakarak dehan, sira-nia direitu-direitu ne'e, ami lori ba tau iha ne'eba, tanba sira-nia direitu ne'e suspende tuir dekretu emerjénsia ne'ebé iha", hakotu nia. (*)