Komandante PNTL Munisípiu Dili, Superintendente Henrique da Costa hatete, relasiona ho insidente ne'ebé mosu iha loron 21 fulan-marsu arguidu hamutuk na'in-7 husi organizasaun IKS ne'ebé halo torturasaun hasoru lezada na’in-2 husi grupu arte ritual 77 iha área Marínir, aldeia Beto Tasi, Suku Madohi, Postu Administrativu Dom Aleixu, Munisípiu Dili.
Komandante Henrique dehan, hafoin informasaun espalla iha públiku liuhusi vídeo torturasaun ba lezada na’in-rua ne’e, parte PNTL halo kedan medida prevensaun hodi kaptura mós suspeitu sira, no atividade prevensaun la'o kedan.
"Atividade prevensaun ne'e la'os dehan husi parte PNTL komandu Munisípiu Dili nian de'it, maibé ita involve parte barak, primeiru Unidade Espesial Polisia (UEP), Batallaun Ordém Públika (BOP), Unidade Polisia Marítima (UPM), Comando Operaçăo Especial (COE)”, informa, Henrique iha Kailoli, tersa (23/03).
PNTL Dili mós hetan reforsa seguransa husi Unidade Polísia Fronteira (UPF), no inkliu Falintil-FDTL husi unidade Polísia Militár (PM), nomós ekipa apoiu kuarte jerál no sentru formasaun.
"Ita-nia rekursu sufisiente para hodi halo medida prevensaun ba ida ne'e, e la'os dehan ida ne'e de'it, maibé iha komunikasaun ho ita-nia parte polísia militár nian atu nune'e halo mós movimentu e apoiu karik nesesidade presiza”, dehan nia.(*)