Iha prosesu buska ne'e, PNTL konsege rekolla evidénsia sira hanesan atributuGAM husi IKS nian farda par-rua, sintu rua, katana rua, no gás ‘air-mata’ rua iha suspeitu sira-nia rezidénsia husi fatin ne'ebé la hanesan, inklui telefone rua ho karreta Pic up ida ne'ebé suspeitu sira uza halo vídeo no tula lezada na’in-rua lori ba hatun iha sentru Unidade Espesial Polísia (UEP) iha Bairru Pite.
Iha buska dahuluk, PNTL hala'o iha suspeitu JODC nia banin nia rezidénsia nu'udár fatin ba akontesimentu torturasaun hasoru vitima na'in-rua iha área Marínir, aldeia Beto Tasi, Suku Madohi, Postu Administrativu Dom Aleixu, maibé la hetan evidénsia.
Iha buska daruak, halao, iha suspeitu JG nia rezidénsia no konsege foti evidénsia katana rua ne'ebé rai subar iha sira-nia kama okos, iha aldeia Beto Tasi, Suku Madohi.
Buska datoluk, polísia halo iha suspeitu AS nia rezidénsia iha aldeia Beto Naroman, Suku Madohi, ekipa sira konsege deteta atributu GAM-IKS nian hanesan farda ida ho sintu, maibé iha buska dahaat ne'ebé hala'o iha aldeia Anin Fuik, iha suspeitu CM nia kost, la deteta evidénsia ruma.
Buska dalima, hala'o iha Suspeitu DDJ aldeia 12 de Outubru, Suku Komoro, Postu administrativu Dom Aleixu, Munisípiu Dili, parte PNTL rekolla "gás air-mata" ida ne'ebé deskonfia katak sira uza hodi habosok vítima sira dehan sira husi ekipa intelijénsia nian.
Iha buska ba daneen, PNTL halo iha aldeia Fomentu 01, suku Komoro, Postu administrativu Dom Aleixu, no konsege rekolla mós evidénsia hanesan farda ho sintu husi organizasaun arte marsial IKS nian iha suspeitu MS nia kuartu laran.
Buska ikus liu, parte PNTL halao iha suspeitu ALBDC nia rezidénsia iha área Ai-tarak Laran, Suku Fatuhada, Postu administrativu Dom Aleixu, Munisípiu Dili.
Komandante PNTL Munisípiu Dili, Superintendente Polísia, Henrique da Costa Belo dehan, investigadór sira halo mandadu buska, revista no aprensaun ba arguidu na'in 7 sira-nia rezidensia ne'ebé lokaliza iha área suku Komoro, no suku Madohi hodi rekolla evidénsia sira ne'ebé suspeitu sira uza hodi halo torturasaun ba lezada na'in-rua.
"Rezultadu buska, revista no aprensaun, rekolla veiculo pic up ida, telemóvel marka oppo 1, realme 1, katana maubeka, kalsa no kamiza treinu Kera Sakti nian, sintu treinu kór metan ho azul, brosura ka stiker Kera Sakti nian”, dehan Komandante Henrique iha Kaikoli, tersa (23/03).
Oras ne’e dadaun, polísia halo ona detensaun ba arguidu na'in-7 hodi detein iha sentru detensaun Munisípiu Dili, maibé investigadór sira deteta tan suspeitu na’in-rua no sei halo mós buska iha tempu badak.
"Investigadór sira halo identifikasaun ba suspeitu foun na'in-rua, prepara relatóriu progresu hodi haruka ba ministériu públiku hodi husu mandadu detensaun foun ba arguidu na'in-rua”, dehan nia.
Entretantu, iha loron 21 fulan-marsu, maizumenus tuku 14:36 lezada na'in ho inisial AC ho DA ne'e, hetan insidente sikuestru no raptu ne'ebé komete husi suspeitu na'in-7, ho nia sirkunsatánsia mak hanesan, halo detensaun ilegál transfere no halo torturasaun ba lezadu na’in-2 iha área fomentu 01, suku Komoro no Beto Tasi, kampung Marínir, Suku Madohi.
Tuir observasaun jornalísta www.tempotimor.com iha terrenu nota katak, durante buska, parte ekipa PNTL mós obriga sobu odamatan hamutuk tolu iha suspeitu sira-nian rezidénsia ne'ebé taka metin hela, tanba deskonfia subar material sira ne'ebé ligadu ho atu kriminal nian ne'ebé sira komete.(*)
