Print this page

PNTL Prende Motorizada 289 no Karreta 24 Viola Kódigu Estrada no Serka Sanitária

Motorizada hamutuk 289 ne'ebé PNTL prende iha Dili durante semana ida laran, oras nee rai hela iha Komandu Polisia Dili, segunda (22/03). Motorizada hamutuk 289 ne'ebé PNTL prende iha Dili durante semana ida laran, oras nee rai hela iha Komandu Polisia Dili, segunda (22/03). Foto Tempo Timor

Tempotimor (Dili) - Polísia Nasional Timor-Leste (PNTL), liuhusi komandu Munisípiu Dili prende motorizada hamutuk 289 no karreta 24, tanba viola lei kódigu estrada no serka sanitária ne'ebé governu implementa.

Komandante Polísia Tranzitu (Poltranz) Munisípiu Dili, Superintendente Polísia Domimgos Gama hatete, motorizada sira ne’ebé prende liuhusi atividade pasa-revista ne'ebé polísia halo durante semana ida hahú iha loron 13 to'o 19 fulan-marsu tinan 2021 iha kapital Dili laran.

"Totál husi dia 13 to'o mai loron 19 liu ba ne'e, ita prende ona motorizada hamutuk 289, karreta hamutuk 24, inklui dokumentu sira”, hatete Komandante Domingos ba iha nia kna'ar-fatin Kaikoli, segunda (22/03).

Polísia halo aprensaun ba motorizada sira ne'e, tanba viola lei kódigu estrada iha artigu 76 no artigu 207 husi lei kódigu penál nian.

Ho koimas ne'ebé PNTL Dili rekolla motorizada nia na’in-sira hamutuk U$3,125.00. Maibé motorista sira komete infrasaun, balu selu ona, bele foti filafali no iha balun seidauk foti, tanba seidauk selu multa.

"Barak mak oras ne'e seidauk selu koimas, sira ne'ebé selu ona ne'e, hahú dia 13 to'o 19 sexta-feira horibainruak, ne'e selu ona multa ne'e mak totál U$3,125.00. Mais barak liu mak seidauk selu, foin mak sira antrian, Ita-boot sira bele haree rasik, sira komesa preukupa ona mai foti nota infrasaun atu ba banku selu. Ne'ebé sira na’in hira ne'ebé mak balu seidauk selu, pasiénsia ita rai hela iha ne'e to'o selu tiha lai mak ami foin entrega ba sira”, dehan nia.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items