Tanba governu liuhusi konsellu Ministru deside serka sanitária no konfinamentu domisiliáriu obrigatóriu ba Kapitál Nasaun, hodi prevene surtu Covid-19 iha rai laran.
Maibé, iha loron 10 fulan-marsu tinan 2021 mosu insidente ida iha Tasitolu oknum PNTL ida husi unidade Batalliaun Ordém Públika (BOP) ne'ebé haruka pesoál SAS na'in-rua basa ba malu, tanda tuur iha kamioneta nia leten.
Nune’e iha kinta loron 18 fulan-marsu tinan 2021, mosu tan insidente hanesan iha Taibessi ne'ebé oknum PNTL ho naran inisial "TX" baku pesoál SAS ida, tanba la uza máskra hodi kontra regra prevensaun Covid-19.
Portavóz Komandu Jerál PNTL, Superintendente Arnaldo de Araújo hatete, kazu insidente ne'ebé akontese membru baku sidadaun mane ida iha área Taibessi, tanba la uza máskra no ko’alia lia-fuan aat ba membru PNTL.
"Hakarak informa de'it katak iha momentu ne'ebá ekipa patrullamentu sira halo hela patrulla iha área refere, to'o iha ne'ebá hetan ita-nia komunidade sira balu tuur iha karreta laran, e vitima ne'ebé mak hetan agresaun ne'e la uza máskra, depois ida ne'e, ita-nia membru polísia sira hasee nia dala-sua, nia la kumpri, depois nia foti tiha máskra mai tau sees tiha. Depois nia hatete katak polísia beik teen. Ho ida ne'e mak ita-nia membru ne'e fó basa dala ida ba vítima ne'e, depois mosu agresaun seluk tan tuir buat ne'ebé mak viral ona iha mídia sosiál”, dehan Arnaldo liuhusi konferénsia imprénsa, iha Komjer Kaikoli, sesta (19/03).
Vítima oras ne'e komandu Munisípiu Dili foti ona nia deklarasaun hamutuk ho sasin sira, inklui ajente polísia ne'e rasik mós hato'o ona nia deklarasaun.
"Ho lia-faun ida dehan polísia beik teen nee mak hamosu emosaun husi polísia ne'e. Ne'ebé dala-ida tan, komandu hakarak ka lakohi tenke identifika e loke prosesu ne'e, hodi hatene oinsá nia kronolojia loloos ne'e halo oinnusá. Maibé kronolójia inísiu vítima fó mak hanesan ohin ha'u hatete”, deklara nia.
Maibé, liuhusi prosesu investigasaun mak foin bele hatene sé mak loos, no sé mak sala.
"Maibé, hakarak hatete de'it ba komunidade sira katak, buat hotu tenke liuhusi prosesu investigasaun. Prosesu investigasaun ba mak foin ita bele haree”, dehan nia.
Portavóz komandu jerál PNTL, Arnaldo mós deklara bebeik ona ba públiku katak, komandu sei la tolera nia membru ne'ebé hatudu má-atitude hasoru komunidade sira, maibé to'o ohin loron sei akontese.
Antes ne’e, Diretór Ezekutivu Fundasaun Mahein (FM), Joăo Almeida mós husu ba komandu PNTL atu loke prosesu dixiplinar ba nia membru, nomós prosesu kriminal ba atu ne'ebé membru sira halo hasoru komunidade, maibé husu mós ba PDHJ atu akompaña prosesu ne'e bele la'o ho transparente.(*)
