Maijór Jeneral Lere deklara kestaun ne'e relasiona ho kritika balun husi membru Parlamentu Nasionál  (PN) ba PNTL ba kazu oho malu ne'ebé iha loron hirak ne'e akontese iha kapital Dili no Munisípiu Baukau.

Deputadu balun konsidera problema ne’ebé rezulta ema balun mate no hetan kanek tanba polisia ladun hala'o serbisu ho di'ak.

“Filozofia PNTL nian mak vijibilidade nee katak polisia nia prejensa tenke iha fatin-fatin, atu  nunee ema labele halo problema, polisia sira labele garantia ba CCTV deit”, deklara deputadu husi bankada FRETILIN, David Dias Ximenes hanesan sita husi jornal INDEPENDENTE edisaun Kuarta  (29/05.

Tuir Mandati, durante ne'e polisia la aplika medida prevensaun maibé aplika medida represiva.

“To'o iha fatin baku ema arbiru de'it. Polisia ne'e tenke hala'o lei no orden, bainhira la tuir ona lei sei laiha mós orden, tanba ne'e tenke hatene konseitu polisia nian”.

Ba kestaun ne'e, Maijór Jeneral Lere hatete, konfrontu ne'ebé mosu, liu-liu entre grupu artemarsiais laos kulpa PNTL nian.

"Situasaun rai laran ita hotu-hotu haree artemarsiais sira komesa ativa, oho malu, sona malu. Foin dadauk mate ita fó sala ba polísia, ha'u dehan polísia la sala, polísia la fó seguransa ba ema ida, polísia iha ninia área seguransa, la signifika halo seguransa par ita kondena polísia dehan polísia la profesional, la marka prezensa, hanesan foin lalais oho malu iha Hotel Timor nian oin ne'e polísia iha, laos polísia laiha mais diatansia (metru) 100, 50 metru, be ema sona mate ona ne'e polísia mak sala ka? Polísia la sala", dehan Lere hafoin hasoru-malu ho Prezidente Repúblika Francisco Guterres Lu Olo iha palásiu prezidensial Bairro-pite, Kuarta (29/05/2019).

Ba Lere impotante mak tenke iha konsiénsia hodi eduka komunidade, tanba tempu atu oho malu liu tiha ona.

"Ha'u bele dehan artemarsias, liu-liu SH no sira seluk ne'e laos Timor nian, ha'u hatete fila fila ona, laos ita mak organiza, ne'e ema Indonezia, funu nia tempu no Indonezia hahú ka harii arte marsiais ne'e atu funu, i agora ita husi de'it ne'e, sira dehan ita prepara asu ida par ba tata rusa mais la tata ne'e, nusa tenke tata animal maus, agora ida ne'e mak akontese", dehan Lere.

Komandante F-FDTL ne'e afirma katak tempu funu no tempu oho malu liu ona. Tan ne'e ba Timor-oan oan ne'ebé oho malu beibeik nu'udar inimigu nasaun nian.

"Agora hakarak oho malu nafatin ne'e laos Timor-oan, ne'e lakohi fó nia aan no ukun aan ba rai ne'ebé ema fakar no so'e isin ba ne'e".

Atu prevene jovens sira tuir arte marsiais para oho malu beibeik maka Jeneral FALINTIL-FDTL ne'e propoin atu kaptura tiha lideransa organizasaun sira ne'e.

"Artemarsiais sira iha sira-nia ulun boot, tanba ne'e ba kaer ulun boot sira ne'e hodi responsabliza," dehan Lere.

Semana ida ikus ne'e mosu kazu ataka no oho malu entre arte marsiais rua iha postu Vemase Municipiu Baukau nune'e mos mosu problema arte marsiais sira tuda malu iha komoro Dili.