Tempotimor (Dili) - Tenente Jenerál FALINTIL-Forsa Defeza Timor-Leste (F-FDTL) Lere Anan Timor, halo apelu ida katak kualkér nomeasaun ne'e akontese iha futuru labele bazeia ba desizaun polítika tanba presiza haree ba lealdade no onestidade.
"Iha futuru mai kualkér nomeasaun ba fatin estratéjiku ligadu ba seguransa labele bazeia ba desizaun polítika maibé bazeia mós ba avaliasaun dezempeñu militár no lealdade, onestidade no omilidade. So hanesan ne'e mak fó garantia ba konstituisaun defeza nasionál bele metin no forte," Lere apela kestaun ne'e iha Palásiu Prezidensiál, Bairru-Pite, sesta(26/2).
Lere dehan, promosaun ne'ebé ohin sira simu husi Prezidente Repúblika ohin marka pájina foun F-FDTL tanba povu Timor-Leste no povu asiste dala-ida tán postu ne'ebé sira na'in-4 simu.
"Tanba ne'e ami-nia promosaun signifika resposabilidade ba instituisaun no ba interese nasionál la'ós ba interese grupu ka individuál nian," dehan Lere.
Lere nu'udar Tenente-Jenerál, Brigadeiru Falur Rate Laek ba Maiór Jenerál, Koronél Calisto Santos Coli ‘Coliati’ ba postu Brigadeiru Jenerál, Kapitaun Mar e Guerra Donaciano do Rosário da Costa Gomes ‘Pedro Klamar Fuik’ ba postu Komodoro, Brigadeiru-Jenerál Domingos Raul no Maior-Jenerál Tito da Costa Cristovão.
Tenente Jenerál Lere esplika, prosesu ba na'in FALINTIL dezde 1975 to'o ohin loron, kuaze tinan 46 sadere ba RDTL ne'ebé F-FDTL sai ona hanesan forsa profisionál
"Ba kompañeiru na'in-tolu, ha'u husu nafatin ita servisu nafatin hanesan inisiadór hodi lori defeza ba oin. Ha'u fiar katak kompañeiru na'in-tolu sei hamutuk ho ha'u nafatin halo ita-nia responsabildade hanesan uluk," informa Lere.
Lere haktuir, dalabarak ema ko'alia jerasaun foun, jeresaun foun maibé konseitu jerasaun foun la refere ba idade, joven ka katuas maibé refere ba mudansa sistema, mudansa mentalidade, refere ba hanoin no hahalok foun no di'ak.
"Promosaun ne'ebé ami na'in-haat hetan iha instituisaun F-FDTL FALINTIL tanba konfiansa estadu nian mai ha'u ka ba ami la'ós tanba karreira militár mak hetan de'it susesu. Ami na'in-rua ho ha'u-nia kompañeiru Falur Rate Laek laiha kursu akadémika nilitár nian, ba ha'u espesialmente ba promosaun ida-ne'e última ona ba ha'u-na karreira militár," dehan Lere.(*)
