Prezidente Repúblika, Francisco Guterres Lú Olo, hafoin simu proposta husi Governu no rona Konsellu Superiór Defeza no Seguransa dekreta promosaun Koronél Calisto Santos Coli ‘Coliati’ ba postu Brigadeiru Jenerál, Kapitaun Mar e Guerra Donaciano do Rosário da Costa Gomes ‘Pedro Klamar Fuik’ ba postu Komodoro, Brigadeiru-Jenerál Domingos Raul ‘Falur Rate Laek’ ba postu Maior-Jenerál no Maior-Jenerál Tito da Costa Cristovão ‘Lere Anan Timur’ ba Tenente-Jenerál.
"Promosaun ba postu ofisiál Jenerál no Jenerál bazeia ba estatutu militár F-FDTL Foun ne’ebé aporova liuhusi Dekretu-Lei númeru 33/2020, 2 setembru", haktuir iha komunikadu ne'ebé tempotimor asesu husi Mídia Prezidente Repúblika iha loron, kinta (25/02/21).
Tuir estatutu militár F-FDTL foun, númeru 1 husi artigu 261 hateten katak, kargu Xefe Estadu-Maiór Forsa Armada okupa husi militár ida ho postu Brigadeiru-Jenerál ou Komodoro.
Promosaun ba Donaciano Gomes atu viabiliza oportunidade ba ninia funsaun iha futuru hodi lidera misaun internasionál ba manuntensaun pás ne’ebé organiza husi Nasaun Unida.
Númeru 1 husi artigu 260 Dekretu-Lei ne’e hateten katak, Vise-Xefe Estadu-Maiór-Jenerál Forsa Armada okupa husi militár ida ho postu Majór-Jenerál ou Kontra-Almirante.
Estatutu militár F-FDTL Foun iha artigu 259 númeru fó-sai katak kargu Xefe Estadu-Maiór-Jenerál Forsa Armada okupa husi militár ida ho postu Tenente-Jenerál ou Vise-Almirante.
Dispozisaun Estatutu militár F-FDTL foun obriga governu aprezenta ba Prezidente Repúblika atu halo promosaun ba postu ofisiál Jenerál no Jenerál hodi ezerse sira-nia funsaun.
Calisto Santos Coli ‘Coliati’ iha fevereiru 2011 promove sai koronél no hahú okupa kargu Xefe Estadu-Maiór iha outubru 2018.
Donanciano Gomes ‘Pedro Klamar Fuik’ hetan promosaun ba Kapitaun Mar-e-Guerra iha 2010 no nomeadu ba Diretór Institutu Defeza Nasionál iha 2012.
Domingos Raul ‘Falur Rate Laek’ hetan promosaun ba Brigadeiru-Jenerál iha juñu 2018 no komesa okupa kargu Vise-Xefe Estadu-Maiór-Jenerál iha outubru tinan hanesan.
Lere Anan Timur hetan promosaun ba Brigadeiru-Jenerál no okupa kargu Vise-Xefe Estadu-Maiór-Jenerál iha novembru 2009. Promove ba Maiór-Jenerál no hahú ninia funsaun nu’udar Xefe Estadu-Maiór Jenerál F-FDTL iha outubru 2011.
Tanba ne'e, Prezidente Repúblika sei prezide serimónia promosaun ba Postu Ofisiál Jenerál no Jenerál, aban, 26 fevereiru 2021, tuku 09.00, iha Palásiu Prezidensiál, Nicolau Lobato. (*)
